Դեռ 2017 թվականին Ամերիկայի միացյալ նահանգների նախագահ Դոնալդ Թրամփն ուսումնասիրում էր Իրանի Իսլամական հեղափոխության պահապանների կորպուսը ահաբեկչական կազմակերպություն ճանաչելու հնարավորությունը: Արդեն այս տարվա ապրիլի 8-ին Սպիտակ տունը հայտարարեց, որ Իրանի Իսլամական հեղափոխության պահապանների կորպուսը ներառել է ահաբեկչական կազմակերպությունների ցանկում։ Sputnik Արմենիայի հետ զրույցում ԵՊՀ Իրանագիտության ամբիոնի վարիչ, բանասիրական գիտությունների թեկնածու Վարդան Ոսկանյանը կարծիք հայտնեց, որ ընդհանրապես շատ դեպքերում դժվար է հասկանալ ԱՄՆ-ի տրամաբանությունը։
«Չնայած, ըստ էության անտրամաբանական գործողություն է, բայց ԱՄՆ-ի շահերի տեսանկյունից որոշակի ազդեցություն սա կարող է ունենալ»,- Իրանի Իսլամական հեղափոխության պահապանների կորպուսը ահաբեկչական կառույցների ցանկում ներառելու ԱՄՆ-ի որոշման մասին իր կարծիքն է հայտնում Վարդան Ոսկանյանը։
Արևելեգատի խոսքով, ԱՄՆ-ը համարում է, որ կորպուսն ահաբեկչական կառույց է, քանի որ ներկա է Սիրիայում, մերձավորարևելյան այն ողջ հատվածում, որտեղ ոչ պաշտոնապես իրենց սեփական շահերն են առաջ տանում իրանցիները։
«Բացի այդ, Միացյալ նահանգները համարում է, որ Իրանի ներսում վարչակարգի հիմնական հենասյուներից մեկը հենց Իրանի Իսլամական հեղափոխության պահապանների կորպուսն է»,-նշում է արևելեգատը։
Ըստ Ոսկանյանի, ԱՄՆ-ը ընտրել է այդ մարտավարությունը, քանի որ շատ ավելի հեշտ է պայքարել ահաբեկչական կառույցի դեմ, քան որևէ երկրի ԶՈւ գվարդիայի, քանի որ Իրանի վրա ազդելու լծակների գործիքակազմն ավելի հարմարավետ կդառնա Վաշինգտոնի համար։
