ԵՐԵՎԱՆ, 17 ապրիլի — Sputnik. Ակտիվիստ Վարդգես Գասպարին պառկած ակցիա է իրականացնում ՀՀ ոստիկանության կենտրոնական մասնաշենքի դիմաց։ Նա իր դժգոհությունն է հայտնում ոստիկանության ծառայողների` Էդգար Ծատինյանի գործով իրականացրած միջոցառումներից։ Գասպարին ոստիկանապետ Վալերիյ Օսիպյանի հետ հանդիպում է պահանջում։
Լուրեր են տարածվել, որ ապրիլի 8-ին ոստիկանները ծեծել են Էդգար Ծատինյանին, և նա մահացել է ծեծի հետևանքով։
Ոստիկանության հասարակայնության հետ կապի և լրատվության վարչությունն ապրիլի 14-ին հաղորդագրություն է տարածել` նշելով, որ իրականությանը չեն համապատասխանում սոցցանցում տարածված տեղեկությունները, թե իբր ոստիկանության Նոր Նորքի բաժնում դաժան ծեծի է ենթարկվել Երևանի բնակիչ Էդգար Ծատինյանը, ապա կուլ է տվել թմրանյութով տոպրակը, որն իբր ոստիկանները փորձել են «գրպանը գցել»։
Ոստիկանությունը նաև հայտնել է, որ Ծատինյանը տեղափոխվել է «Սուրբ Գրիգոր Լուսավորիչ» , ապա «Արմենիա» բժշկական կենտրոններ, իսկ ապրիլի 8-ին հիվանդանոցում մահացել։
Ոստիկանության ներկայացրած դատաբժշկական եզրակացության համաձայն` մահվան պատճառը սուր սիրտ-անոթային և շնչառական անբավարարությունն է եղել, ամֆետամինով թունավորումը և տոքսիկ կոման:
Էդգար Ծատինյանը մի քանի անգամ դատապարտված է եղել, նա ոստիկանության Նոր Նորքի բաժին է տարվել ապրիլի 7-ին։ Այստեղ նրա ինքնազգացողությունը կտրուկ վատացել է, ինչից հետո ոստիկանները շտապօգնություն են զանգահարել։
Ապրիլի 14-ին Ծատինյանի հարազատները հաղորդում են տվել, որ ոստիկանները նրան ծեծելով սպանել են, բժիշկներն էլ պատշաճ բուժօգնություն ցույց չեն տվել:
Ոստիկանության պետ Օսիպյանը հանձնարարել է ծառայողական քննություն անցկացնել դեպքի բոլոր հանգամանքները պարզելու համար, այդ թվում` ստուգելով նաև սուտ մատնության վարկածը։
