ԵՐԵՎԱՆ, 11 ապրիլի — Sputnik. Կոռուպցիայի դեմ պայքարում ամենամեծ բանը, որ պետք է անի ՀՀ վարչապետ Նիկոլ Փաշինյանը, իր` կոռուպցիայի մեջ չներքաշվելն է։ Այս մասին Եվրոպայի խորհրդի խորհրդարանական վեհաժողովում (ԵԽԽՎ) ելույթի ժամանակ ասաց ՀՀ վարչապետ Նիկոլ Փաշինյանը։
«Կոռուպցիայի դեմ պայքարում շատ կարևոր է, որ ես, ընտանիքս ու հարազատներս ուշադրության կենտրոնում լինենք։ Մյուս կողմից, չեմ կարծում, որ աշխարհում կա որևէ վարչապետ, որը կասի` ես կամաց–կամաց մտադիր եմ կոռուպցիայի մեջ ներքաշվել։ Այս առումով շատ կարևոր է իմ խոսքի նկատմամբ ժողովրդի վստահությունը։ Կառավարության ղեկավարի կարգավիճակում լինելս իմաստավորված եմ համարում այնքան ժամանակ, քանի դեռ ունեմ ժողովրդի վստահությունը»,–ասաց վարչապետը։
Ըստ նրա` ճիշտ է, թափանցիկությունը Հայաստանում 100 տոկոսով կայացած իրավիճակ չէ, սակայն մեծ քայլերով գնում ենք դեպի դրան։ Փաշինյանն օրինակ բերեց օրերս իր մերձավոր ազգականներից մեկի նկատմամբ քրեական գործի հարուցումը։
Հիշեցնենք, որ ՀՀ վարչապետ Նիկոլ Փաշինյանի ցուցումով քրեական գործ է հարուցվել նրա մերձավոր ազգականներից մեկի` ենթադրյալ չարաշահման փաստով։
Փաշինյանը Ստրասբուրգ է մեկնել երեկ` մասնակցելու ԵԽԽՎ–ի գարնանային նստաշրջանին։
