ԵՐԵՎԱՆ, 11 ապրիլի — Sputnik. Լոնդոնի դատարանը մեղավոր է ճանաչել WikiLeaks–ի հիմնադիր Ջուլիան Ասանժին` գրավի դիմաց դուրս գալու պայմանները խախտելու համար և նրա գործով հաջորդ լսումները նշանակել մայիսի 2-ին, փոխանցում է ՌԻԱ Նովոստին։
«Պարոն Ասանժ, դուք կալանքի տակ եք մնում մինչև հաջորդ լսումները։ Դրանք տեղի կունենան մայիսի 2-ին։ Դուք խախտել եք գրավի դիմաց ազատ արձակվելու պայմանները», – ասաց գործն ուսումնասիրող Վեստմինստեր շրջանի դատարանի դատավորը։
Դատական նիստի ժամանակ Ասանժը մի քանի անգամ կարճ պատասխանել է հարցերին։ Մասնավորապես նա հայտարարել է, որ չի ընդունում իր մեղքը` ոստիկանությանը հանձնվելուց հրաժարվելու հետ կապված մեղադրանքի մասով։
Ասանժին ձերբակալել էին հինգշաբթի առավոտյան Շվեդիայի և ԱՄՆ–ի օրդերներով։ Շվեդիայում նա մեղադրվում է սեռական բնույթի հանցագործություններում, ԱՄՆ–ն նրան մեղադրում է նախկին զինծառայող Չելսի Մենինգի հետ դավադրություն իրականացնելու և նրա կողմից հափշտակած ծառայողական փաստաթղթերի հրապարակման մեջ։
