ԵՐԵՎԱՆ, 11 ապրիլի – Sputnik. ՀՀ կառավարությունն այսօրվա նիստում հավանություն տվեց ՀՀ և Չինաստանի Ժողովրդական Հանրապետության կառավարությունների միջև ստորագրված «Օդային հաղորդակցությունների մասին» համաձայնագրին։
Կառավարության համոզմամբ` համաձայնագիրը համահունչ է քաղաքացիական ավիացիայի ոլորտում Հայաստանի իշխանությունների որդեգրված «Բաց երկնքի» քաղաքականությանը։
Համաձայնագրով նախատեսվում է ազատականացնել ավիաընկերությունների առաջարկած տարողության, սակագների, չվերթերի հաճախականության, սպասարկվող երթուղիների դրույթները։ Սա, ըստ համաձայնագրի, կապահովի ավիաընկերությունների միջև արդար և հավասար մրցակցությունը` միաժամանակ ապահովելով պետությունների կողմից թռիչքային անվտանգության ապահովման պարտավորությունների կատարումը։
Համաձայնագիրը ստորագրվել է 2018թ. սեպտեմբերի 15-ին։ Հայկական կողմից այն ստորագրել է ՀՀ քաղաքացիական ավիացիայի կոմիտեի նախագահ Տաթևիկ Ռևազյանը։
Չինական կողմը հայտնել է, որ համաձայնագիրը կվավերացնի առաջիկա 2-3 ամիսների ընթացքում։
Հայաստանում այն կվավերացվի, երբ խորհրդարանն ընդունի, իսկ հետո էլ ստորագրի ՀՀ նախագահը։
