ԵՐԵՎԱՆ, 9 ապրիլի — Sputnik. Երևանի «Փյունիկը» և գլխավոր մարզիչ Անդրեյ Տալալաևը փոխադարձ համաձայնությամբ խզել են պայմանագիրը: Այս մասին տեղեկացնում ենք ակումբի պաշտոնական կայքից:
Ռուս մասնագետն ընտանեկան հարցերի բերումով վերադարձել է Ռուսաստան:
«Ցանկանում եմ շնորհակալություն հայտնել ակումբին, երկրպագուներին, ֆուտբոլիստներին և բոլոր աշխատակիցներին: Վստահ եմ, որ թիմը մինչև վերջ կպայքարի ամենաբարձր տեղերի համար:
Ցանկանում եմ առանձնահատուկ շնորհակալություն հայտնել ակումբի նախագահ Արթուր Սողոմոնյանին, որ թույլ տվեց աշխատել և զարգանալ թիմի հետ զուգահեռ: Հաջողություն եմ մաղթում «Փյունիկին»,- հրաժեշտի խոսքում ասել է Տալալաևը:
Նա «Փյունիկի» գլխավոր մարզիչն էր 2018 թվականի հունիսից և նրա գլխավորությամբ թիմը Եվրոպա լիգայի 2018/19թթ. խաղարկությունում դուրս եկավ որակավորման 3-րդ փուլ:
Ակումբը նույնպես շնորհակալություն է հայտնել Անդրեյ Տալալաևին սրտացավ աշխատանքի համար և մաղթել հաջողություններ կարիերայում:
