ԵՐԵՎԱՆ, 8 ապրիլի — Sputnik. Մեզ համար մութ է Փաշինյան-Ալիև հանդիպման մանրամասները: Այսօր ԱԺ-ում լրագրողների հետ զրույցում ասաց ԱԺ ԲՀԿ խմբակցության ղեկավար Գագիկ Ծառուկյանը` հավելելով, որ մի շարք հարցերի պարզաբանում ստանալու համար խորհրդարանում ծրագրում են փակ հանդիպման հրավիրել վարչապետ Նիկոլ Փաշինյանին։
«Խորհրդարանում վարչապետին փակ հանդիպման ենք հրավիրել։ Հրավիրելու ենք նախ Արցախի մեր պատգամավոր ընկերներին, որ այդ հարց ու պատասխանը մեզ համար պարզ լինի»,- ասաց նա:
Մեկնաբանելով Արցախի անվտանգության խորհրդի քարտուղար Վիտալի Բալասանյանի հայտարարությանը, թե ով Արցախը համարում է մարզ, կարող է ընդհանրապես Արցախ չգնալ, Ծառուկյանն ասաց, որ համամիտ է նրա հետ։
«Լրիվ ճիշտ է, ընդունում եմ այդ հայտարարությունը: Գիտեք` 28 տարի Արցախն առանձին պետություն է, ունի իր ԱԺ նախագահը, իր ծրագիրն ու գործունեությունը, ու մեր ժողովրդի պայքարը անկախ պետության համար է եղել»,- ասաց նա։
Հիշեցնենք, որ Հայաստանի և Ադրբեջանի արտգործնախարարների վերջին հանդիպումը կայացել է մարտի 28–ին Ավստրիայի մայրաքաղաք Վիեննայում։ Մարտի 29–ին Վիեննայում կայացել է նաև ՀՀ վարչապետ Նիկոլ Փաշինյանի և Ադրբեջանի նախագահ Իլհամ Ալիևի հանդիպումը։
Արցախի անվտանգության խորհրդի քարտուղար Վիտալի Բալասանյանը Sputnik Արմենիայի հետ զրույցում ասել էր, որ Հայաստանը պետք է հանդես գա որպես Լեռնային Ղարաբաղի անվտանգության և անկախության երաշխավոր։ Արցախի անվտանգության խորհրդի քարտուղարի գնահատմամբ` քաղաքական առումով Արցախի հարցը լուծված է, և կարևոր խնդիրն այսօր երկիրը շենացնելը, տնտեսությունը զարգացնելը, համերաշխ ապրելն ու ազգը սև- սպիտակի բաժանողներից ազատվելն է։
