ԵՐԵՎԱՆ, 7 ապրիլի — Sputnik, Արմենուհի Մխոյան. Գյումրու Կումայրի ճարտարապետական արգելոցում այսօր՝ ապրիլի 7-ին, շահագործման հանձնվեց նախկին վարչապետ Կարեն Կարապետյանի ընտանիքին պատկանող ռեստորանը:
Քաղաքի հին կենտրոնում, տեղացիների ասած, պատմական միջուկում, Ջիվանու փողոցում գտնվող 19-րդ դարի կառույց հանդիսացող և մինչ այս գյումրեցիներին հայտնի «Ջրահարս» ռեստորանը Կարապետյան ընտանիքի կողմից հիմնանորոգվեց:
Գյումրեցիների ու քաղաք այցելած հյուրերի աչքը շոյող կառույցը թեև շատ գյումրեցիների կարծիքով «իրենց ծակ գրպանին» հարմար չէ, բայց շենքը ավերակներից փրկելու լավագույն տարբերակն է:
«Հմի տեսա՞ք օր աշխարհի կենտրոնը Գյումրին է՝ ՀՀԿ-ն օր ՀՀԿ է, վերջիվերջո ընդունեց էդ խոսքն ու ի դեմս Կարապետյանի որոշեց ստեղ գործ դնել. գիտե օր Գյումրին հաջողություն կբերե ու իրա գործը աջին կեշտա,-նշում էին ռեստորանի բացման գեղեցիկ արարողությանը հեռվից հետևող բնակիչներն ու ավելացնում, – նախկիններից միակ լավ բանը ըսիկ մնաց. ինչ էնեք, օր մեր նպաստով ու թոշակով չենք կռնա թասմ օղի խմել ու վայելել: Միակ բանը, օր կափսոսանք նախկիններից, մենակ էս տարածքի հետ է կապված: Կարապետյանը էկավ էս ներդրումն էրեց, ընկերներին էլ բերեց, հմը ինքը գնաց, ընկերների ներդրումն էլ հետը»:
Ռեստորանի բացմանը Կարեն Կարապետյանը կամ նրա ընտանիքից որևէ մեկը ներկա չէր, բայց դա չխանգարեց ներկայացուցիչներին գեղեցիկ անակնկալ պատրաստել բոլորի համար` գյումրվա ֆայտոն, փողային նվագախումբ, «Ֆլորնես» և ARATTA բենդեր՝ բոլորի ճաշակին համապատասխան:
Ի դեպ, Կարապետյան ընտանիքը նախատեսել էր այս գործում ներդնել կես միլիոն դոլարին համարժեք գումար, գայց ընթացքում 2,5 անգամ ավելի է ծախսվել:
