ԵՐԵՎԱՆ, 5 ապրիլի — Sputnik, Արմենուհի Մխոյան. Գյումրիում ապրիլի 5-ին խառնաշփոթ էր. մի կողմից քաղաքապետարանի բնակկոմունալ տնտեսության ջրցան մեքենաները մեծ ակտիվությամբ ջրում էին քաղաքի փողոցները՝ փորձելով «մեղմել» քաղաքի փոշին, մյուս կողմից ՀՀ վարչապետին տեսնելու ու իրենց դարդն ու ցավը պատմելու էին շտապում քաղաքացիները: Ի դեպ, «Նիկոլի հետ հանդիպման» էին շտապում ոչ միայն գյումրեցիները այլ նա մարզի մյուս համայնքների բնակիչները:
Բողոքները շատ տարբեր էին՝ համաներումից մինչև անօթևանության ու վթարային շենքերի հետ կապված խնդիրներ: Իսկ քաղաքի փողոցների հիմնանորոգման պատճառով ստեղծված քաոսային իրավիճակին ՀՀ վարչապետն անձամբ ականատես եղավ: «Ես զարմանում եմ՝ մարդիկ ինչպես են քայլում, ինչպես են մեքենա վարում: Բարձրակրունկով կանայք ինչպես են քայլելու»: Գյումրու քաղաքապետը բացատրեց՝ «քանդել ենք, որ կառուցենք», ինչին ի պատասխան Փաշինյանն ասաց, «Թող ցույց տան՝ մարդիկ որտեղ են քայլելու, որն է լինելու ճանապարհը: Եթե մայթն ու փողոցը քանդում եք մտածու՞մ եք քաղաքացին ինչպես է քայլելու»,- ասաց Փաշինյանը հավելելով «Մենք այստեղ չենք եկել դատաստան անելու, եկել ենք մտածենք՝ ոնց ենք էս խնդրին լուծում տալ»:
Բնակիչներից շատերը ոչ միայն իրենց բողոքներով ու անձամբ ՀՀ վարչապետին ուղղված նամակներով էին մոտենում, այլ պարզապես Փաշինյանին տեսնելու մեծ ցանկությամբ: Շատերը բղավում էին. «Նիկո՛լ, դուխով արի Գյումրի»:
«Թող Նիկոլը մեր աջ ձեռքը լինի, մենք՝ ձախը: Թող մեր քաղաքին տեր լինի մենք էլ իր թիկունքին կանգնենք»,- Sputnik Արմենիայի թղթակցի հետ զրույցում նշեց Աննա Կիրակոսյանը:
Ինչպես 2018 թվականի դեկտեմբերի 7-ին, այնպես էլ այսօր ՀՀ վարչապետին տեսնելու նպատակով Ախուրյանից Գյումրի էր եղել 15 ամյա Հրանտ Չալոյանը: «Այս անգամ ոչ մի խնդիր չունեմ, պարզապես իմացա, որ գալիս է ու որոշեցի գալ ու տեսնել»,- Sputnik Արմենիային անկեղծացավ տղան վստահեցնելով՝ ոչ մի խնդիր չունի: Տղային ՀՀ վարչապետը տեսավ ու բարևեց, բայց այս անգամ ուղեկցել չառաջարկեց: «Ինչպե՞ս առաջարկեր, հնարավոր չէր»,-նշեց տղան:
Հրանտն այն տղան է, որին հաջողվեց երկրաշարժի 30-րդ տարելիցին մոտենալ վարչապետին:
![«Նիկո՛լ, դուխով արի Գյումրի». գոչում էին գյումրեցիները՝ դիմելով ՀՀ վարչապետին «Նիկո՛լ, դուխով արի Գյումրի». գոչում էին գյումրեցիները՝ դիմելով ՀՀ վարչապետին - Sputnik Արմենիա](https://cdn.am.sputniknews.ru/img/1794/28/17942840_0:0:1600:1064_600x0_80_0_0_3ff34522e34498f9ba6c527b5ec24302.jpg)
Տղայի խնդիրն առանձին լսելու համար ՀՀ վարչապետը Հրանտի հետ բավական երկար մեքենայով շրջում էր քաղաքում: