«Ֆերմերային շարժում» հասարակական կազմակերպության նախագահ Սարգիս Սեդրակյանը Sputnik Արմենիայի հետ զրույցում, թեև ողջունում է ոլորտում իրականացվող ծրագրերը, սակայն համոզված է, որ գյուղատնտեսության ոլորտը բարձիթողի վիճակում է։ Գյուղատնտեսը պնդում է, որ ոլորտին առնչվող խնդիրները մասնագետների ու քաղհասարակության ներկայացուցիչների հետ գրեթե չեն քննարկվում։ Ըստ Սարգիս Սեդրակյանի, գյուղատնտեսությունն այսօր բարձիթողի վիճակում է։
«Նախարարից սկսած, գյուղատնտեսական կրթություն չունեն, չեն հասկանում գյուղատնտեսությունից, մի քանի բան անգիր են արել՝ կաթիլային ոռոգում, հակակարկտային ցանց, բայց ոլորտից չեն հասկանում»,-ասում է Սարգիս Սեդրակյանը։
Մասնագետի խոսքով, գյուղատնտեսության ոլորտը վտանգված է։
«Շատ սխալ որոշում է գյուղատնտեսության նախարարությունը ներառել տնտեսական զարգացման ու ներդրումների նախարարության կազմում, պետք է մասնագետ լինեն, որպեսզի ճիշտ որոշումներ կայացնեն»,-տարակուսում է գյուղատնտեսը։
Ինչ վերաբերում է «խելացի անասնաշենքերի» կառուցման ծրագրին, ապա մասնագետը, թեև ողջունում է ծրագիրը, այդուհանդերձ վերապահում ունի «խելացի» բառի հետ կապված։
Նոր անասնագոմերի ծրագրի արժեքը երկուս ու կես միլիարդ դրամ է, որի շրջանակում նախատեսվում է նաև ֆերմերների ուսուցում: Նոր ծրագրի իրականացման արդյունքում կառավարության հաշվարկով կկառուցվեն շուրջ 230 խելացի անասնագոմեր, մեկ գլուխ կովի հաշվով կաթնատվության մակարդակը կբարձրանա 3500-ից մինչև 4000 լիտր, կավելանա անասնագլխաքանակը:
