ԵՐԵՎԱՆ, 4 ապրիլի — Sputnik. Հայաստանում փախստականների ու ապաստան հայցողներ թիվը տարեցտարի աճում է: Այս մասին է վկայում կառավարության նիստին այսօր Տարածքային կառավարման նախարարության ներկայացրած նախագիծը:
Ըստ ներկայացված տեղեկանքի` 2016 թվականին ՀՀ կառավարությանը ապաստան տրամադրելու խնդրանքով դիմել էր 110 անձ, 2017 թվականին` 151, 2018 թվականին` 218:
Եվ քանի որ 2018 թվականին ապաստան հայցողների թվաքանակը գերազանցել է այդ նպատակի համար բյուջեում հատկացված միջոցները, նախարարությունը փաստում է, որ 2019 թվականին ևս այդ ծրագրի իրականացման համար նախատեսված գումարը չի բավականացնի և առաջարկում է ծրագրի գումարն ավելացնել ևս 1 290 000 դրամով: Այս հաշվարկով, ըստ նախագծի, 2019 թվականին դրամական օգնություն կտրամադրվի հավելյալ 14 դիմումատուի և նրանց ընտանիքների 10 անդամի: Բացի այդ փախստականների համար ՀՀ-ում կազմակերպվում են կողմնորոշման դասընթացներ, որի համար այս տարվա պետական բյուջեով նախատեսվել է 2 250 000 դրամ:
2019 թվականին քաղաքացիական կողմնորոշման դասընթացներին մասնակցելու համար կընդգրկվեն շուրջ 64 անձ:
