ԵՐԵՎԱՆ, 3 ապրիլի – Sputnik. Բրիտանացի գիտնականներն ապացուցել են, որ սմարթֆոնի PIN կոդը հնարավոր է «կոտրել» ձայնային ալիքների միջոցով։ Քեմբրիջի համալսարանի գիտնականների հետազոտությունը հրապարակվել է Կոռնելի համալսարանի էլեկտրոնային պահոցում։
Նրանք վստահեցնում են, որ երբ հեռախոսի տերը հավաքում է գաղտնաբառը կամ էլ PIN կոդը, ստեղծում է որոշակի ձայնային տատանումներ։ Եվ եթե հեռախոսը վարակվում է տրոյական ծրագրով, որը միկրոֆոնի միջոցով կարողանում է հաշվել ձայները, ապա հնարավոր է պարզել ցանկացած PIN կոդ կամ էլ գաղտնաբառ։
Գիտնականները որոշել են ասածն ապացուցել գործով և Android համակարգերի համար գաղտնալսող հավելված են ստեղծել, որը հավաքագրում է հպման ձայները։
«Լրտես» ծրագիրը փորձարկվել է մի քանի տասնյակ մարդկանց հետ, և պարզվել է, որ նմանատիպ տարբերակով կարելի է «կորզել» հավաքվող գաղտաբառերի մոտ 60%-ը։
Սմարթֆոն «ջարդելու» նոր մեթոդի հեղինակները միաժամանակ սփոփել են մարդկանց։ Նրանց խոսքով` գոյություն ունեն հատուկ միջոցներ, որոնք կօգնեն խուսափել նմանատիպ անախորժություններից։ Օրինակ` կարելի է գաղտնաբառը հավաքելու ընթացքում պարզապես անջատել սմարթֆոնի միկրոֆոնը։
