ԵՐԵՎԱՆ, 3 ապրիլ — Sputnik. ՍՈՒ-30 կործանիչների համար վճարվել է նաև կանխիկ գումար՝ ընդհանուր ծրագրի շրջանակում:
Այս մասին Sputnik Արմենիայի հետ զրույցում ասաց ՀՀ ՊՆ մամուլի քարտուղար Արծրուն Հովհաննիսյանը։
Նշենք, որ «Ժամանակ» թերթը գրել էր, որ ՍՈՒ-30 ռազմական օդանավերից 2-ի համար վճարվել է կանխիկ, և այդ միջոցները գոյացել են օլիգարխների կողմից ՊՆ-ին կատարված կամավոր-պարտադիր վճարումներից:
«Չի ասվել, թե ՍՈՒ-30 կործանիչներն ամբողջությամբ ձեռք են բերվել վարկային միջոցներով։ Նաև չեմ կարող ասել, թե Ռուսաստանից գնած չորս ՍՈՒ-30 կործանիչներից քանիսն են ձեռք բերվել կանխիկ: ՊՆ-ն ծրագիր է ներկայացնում, բանակցվում է, հիմնավորվում է, իսկ գումարը հատկացնում է Ֆինասների նախարարությունը»-ասաց Արծրուն Հովհաննիսյանը:
ՊՆ մամուլի խոսնակի խոսքով` կա ձեռքբերման սխեմա, կան դասակարգված տեղեկություններ, բայց փակագծերը չպետք է շատ բացել:
Հիշեցնենք, որ հունվարի 30–ին ի պատասխան Sputnik Արմենիայի հարցման, ՀՀ ՊՆ–ից տեղեկացրել էին, որ Հայաստանի Հանրապետության կողմից ռուսաստանյան Սու–30ՍՄ ինքնաթիռների ձեռքբերման վերաբերյալ համապատասխան գործարքը ստորագրվել է։Մատակարարումը սպասվում է 2020թ.-ին։
