ԵՐԵՎԱՆ, 29 մարտի — Sputnik. Ռուս երգիչ Ստաս Միխայլովի համերգը` նախատեսված ապրիլի 2–ին, պաշտոնապես չեղարկվել է։
Այդ մասին ասվում է կազմակերպչի` Կ–Կոնցերտ ընկերության հաղորդագրությունում։ Բոլոր վաճառված տոմսերը ենթակա են վերադարձի այն դրամարկղներում, որտեղից դրանք գնվել են։
Ավելի վաղ արտիստի տնօրեն Թաբրիզ Շահիդին հայտնել էր Sputnik Արմենիային, որ Ստաս Միխայլովը չեղարկել է համերգը Երևանում։
Նրա խոսքով` որոշումն ընդունվել է համերգի կազմակերպիչների անբարեխղճության և պայմանագրի պայմանները չկատարելու պատճառով։ Միաժամանակ, կազմակերպիչները հայտարարել են, որ պայմանագրի պաշտոնապես խզելու մասին ծանուցում չեն ստացել։
«Բայց որպես կազմակերպիչ` մենք ամեն ինչ արել ենք և շարունակում ենք անել, որպեսզի այդ համերգը կայանա», – ասել է համերգի պաշտոնական ներկայացուցիչ Եվգենի Անցիֆերովը։
