ԵՐԵՎԱՆ, 29 մարտի - Sputnik. Ալբերտ Էյնշտեյնի անձնական նամակները, որոնցում նա խոսում է «Հիտլերի խելագարության», «հրեա ժողովրդի միասնականության» ու հարաբերականության տեսության մասին, երեկ վաճառվել են Nate D. Sanders աճուրդում։ Այս մասին հայտնում է ՌԻԱ Նովոստին։
Աճուրդի տունը հայտնել է, որ 1939 թվականին գրված նամակի համար ավելի քան 134 հազար դոլար են վճարել։
Ընդհանուր առմամբ վաճառել են հինգ անձնական նամակ, որոնցից երեքում (1934, 1939, 1921 թվականների) գիտնականն անդրադարձել է Հիտլերի կառավարման օրոք տեղի ունեցած իրադարձություններին։
1921 թվականին գրված նամակում Էյնշտեյնը քրոջը գրել է, որ չի կարողանում Մյունխեն մեկնել, քանի որ այդ ուղևորությամբ «կվտանգի կյանքը»։ 1921 թվականին Մյունխենում հակասեմիթական տրամադրություններ էին տիրում, Ադոլֆ Հիտլերը նոր էր դարձել Նացիոնալ-սոցիալիստական բանվորական կուսակցության ղեկավար։
1934 թվականի նամակում Էյնշտեյնն իր առաջին կնոջը գրել է շիզոֆրենիայով տառապող որդու բուժման մասին։ Նշել է, որ գումար է ուղարկում ընտանիքին, թեև ինքն էլ այդ ժամանակ ծանր կացության մեջ էր։
«Այս ամենը Հիտլերի խելագարության հետևանքն է, որն ամբողջովին քայքայել է ինձ շրջապատող բոլոր մարդկանց կյանքը», – գրել է նամակում։
«Դիմակայության այն ուժը, որը թույլ է տվել հրեա ժողովրդին ողջ մնալ հազարամյակների ընթացքում, մեծ մասամբ հիմնված էր փոխօգնության ավանդույթների վրա։ Տառապանքի այս տարիներին միմյանց օգնելու պատրաստականությունը լուրջ փորձությունների է ենթարկվում։ Թող մենք դիմակայենք այս փորձությանն այնպես, ինչպես մեր հայրերն են մեզնից առաջ դիմակայել։ Մենք չունենք ինքնապաշտանության այլ միջոցներ, բացի մեր համերաշխությունից ու այն գիտակցումից, որ մեր տառապանքի պատճառը կարևոր է ու սուրբ», – 1939 թվականին գրել է Էյնշտեյնը բժիշկ Մորիս Լենցին (Dr. Maurice Lenz) ։
1945 թվականին գրված բացառիկ նամակում էլ մի շարք հավասարումներ կան։ Էյնշտեյնը նամակը գրել է իր օգնական Էռնստ Ստրաուսին` քննարկելով ձգողականության ռելյատիվիստական տեսության մի քանի հավասարումների նշանակությունն ու հետևանքները։
Մարտի սկզբին Երուսաղեմի հրեական համալսարանը ներկայացրել էր Ալբերտ Էյնշտեյնի` նախկինում անտիպ 110 էջ ձեռագրերը, որոնք վերաբերում են գիտական ուսումնասիրություններին, ինչպես նաև նացիստական Գերմանիայի տարիներին որդուն ուղղված նամակներ են։
