ԵՐԵՎԱՆ, 28 մարտի — Sputnik. ՀՀ կառավարությունն առաջարկում է ՏՏ ոլորտի նորաստեղծ` «ստարտափ» ընկերությունների համար գործող հարկային արտոնությունների ժամկետը երկարացնել մինչև 2023թ.-ի հունվարի 1-ը:
Այս մասին օրենքի նախագիծն այսօր ԱԺ-ում ներկայացրեց ՀՀ տրանսպորտի, կապի և ՏՏ նախարար Հակոբ Արշակյանը:
«2018թ.-ի փետրվարի 1-ից հետո տրամադրված հավաստագրերը, ըստ առաջարկվող փոփոխության, գործելու են մինչև 2022թ.-ի դեկտեմբերի 31-ը ներառյալ»,- ասաց նախարարը` օրենքի փոփոխության բուն առաջակը ներկայացնելով:
Հարկային արտոնություններից, ի դեպ, կարող են օգտվել ոչ միայն հայաստանյան, այլև միջազգային այն ընկերությունները, որոնք Հայաստանում նոր մասնագիտական կենտրոններ կհիմնեն:
Անդրադառնալով խնդրին, որ հայկական ՏՏ ոլորտի ընկերությունները գերադասում են գրանցվել ու գործել արտերկրում` նախարարը ոչ միայն չհերքեց այդ միտումի առկայությունը, այլև հայտնեց, որ դրանք հիմնականում գրանցվում են ԱՄՆ Դելավեր նահանգի համանուն քաղաքում:
Նախարարի խոսքով, ԱՄՆ-ում գրանցվելով այդ ընկերությունները հիմնական գործունեություն ծավալում են Հայաստանում, գալիս են այստեղ և գնում են տեղական որևէ ընկերություն:
«Այնտեղ ինժեներական թիմ չեն պահում, ինժեներական թիմը պահում են Հայաստանում և դրամական հոսքը ևս տեղի է ունենում Հայաստանում»,- ասաց Արշականը:
Այս մեխանիզմի արդյունքում, ըստ նախարարի, հայաստանյան տնտեսությունը 2018թ.-ին 2-3 մլն դոլարի հարկ է կորցրել, որն Արշակյանի գնահատմամբ` մեծ թիվ չէ:
Նշենք, որ ՏՏ ոլորտի համար վերոնշյալ արտոնությունը գործում է 2015թ.–ից։
