ԵՐԵՎԱՆ, 26 մարտի — Sputnik. Գր. Լուսավորիչ բժշկական կենտրոնում ՀՀ պետական վերահսկողական ծառայության կողմից հեմոդիալիզի պարագաների գնման մրցույթի մշտադիտարկման արդյունքում հայտնաբերվել են «Գնումների մասին» ՀՀ օրենքի մի շարք խախտումներ։ Այս մասին տեղեկանում են ՀՀ պետական վերահսկողական ծառայությունից։
Ծառայության տարածած հաղորդագրության համաձայն` հեմոդիալեզի սարքեր ձեռք բերելու մրցույթին մասնակցել է միայն «Ֆրեզեն» ՍՊԸ-ն, և բուժկենտրոնի կողմից հայտարարված մրցույթի համեմատ` նույն ապրանքները ձեռք են բերվել 30%-ով ավելի թանկ գներով։
«Գր. Լուսավորիչ և Վանաձորի ԲԿ–ի` «Ֆրեզենի» կողմից իրացված ապրանքների և մաքսային արժեքների համեմատությամբ պարզվել է, որ իրացված 1,600,999.0 հազ. դրամի պարագաների մաքսային արժեքը կազմել է 722,670.0 հազ. դրամ, այսինքն՝ բժշկական կենտրոններին ապրանքները մատակարարվել են մաքսային արժեքից շուրջ 2.2 անգամ թանկ գներով։ Արդյունքում ստացվում է, որ միայն հեմոդիալիզի սարքերի և պարագաների ներմուծմամբ և իրացմամբ զբաղվող «Ֆրեզեն» ՍՊԸ-ն պետական կարիքների համար գնման մրցույթներին մասնակցելով, ապահովում է գերշահույթ»,–նշված է հայտարարության մեջ։
2015-2018 թթ. ընթացքում հեմոդիալիզի սարքավորումներ և պարագաներ են ներմուծվել թվով 8 կազմակերպությունների կողմից, որոնցից 2 կազմակերպություններ՝ «Ֆրեզեն» և «Նատալի Ֆարմ» ՍՊԸ-ները, ներմուծել են ընդհանուրի 82.9%-ը՝ համապատասխանաբար 41.7% և 41.2% մասնաբաժիններով։ Ընդ որում, ՀՀ տարածքում գործող 9 պետական բժշկական կենտրոններից 3-ին («Սուրբ Գրիգոր Լուսավորիչ բժշկական կենտրոն», «Վանաձորի բժշկական կենտրոն», «Կապանի բժշկական կենտրոն») հեմոդիալիզի պարագաներ է մատակարարել «Ֆրեզեն» ՍՊԸ-ն, իսկ մնացածին՝ «Նատալի Ֆարմ» ՍՊԸ-ն։
Հեմոդիալիզի ծառայությունները պետական պատվերի շրջանակներում մատուցվում են նաև ոչ պետական բժշկական կենտրոններում։
