ԵՐԵՎԱՆ, 24 մարտի — Sputnik. Աշխարհահռչակ ռոք երաժիշտ, System of a Down խմբի հիմնադիր Սերժ Թանկյանը հոդված է գրել նորզելանդական Newshub թերթի համար, որում բացահայտ կոչ է անում ապրիլի 25-ին զբոսաշրջային այցելություններ չկատարել Թուրքիա։
Թանկյանը հիշեցրել է, որ Թուրքիայի կառավարությունն Էրդողանի ղեկավարությամբ տարեցտարի միլիոնավոր դոլարներ է ծախսում Վաշինգտոնում և աշխարհի մյուս մայրաքաղաքներում՝ ուղղված Հայոց ցեղասպանությունը ճանաչելու դեմ քարոզչությանը, որի տարելիցը նշում են ապրիլի 24-ին։ Միաժամանակ ակտիվորեն քարոզում է Օսմանյան զորքերի հաղթանակի ամսաթիվը Անտանտի դաշինքի զորքերի դեմ։
Խոսքը Դարդանելի գործողության մասին է, որը հայտնի է որպես «Չանաքելեի ճակատամարտի» և «Գալիպոլիի մարտ»։ Առաջին համաշխարհային պատերազմի ժամանակ 1915թ-ին գործողության ընթացքում թերակղզում ընթացել են թեժ մարտեր, որոնք պսակվել են օսմանյան բանակի հաղթանակով։ Գալիպոլիի հաղթանակը հսկայական նշանակություն է ունեցել ոչ միայն Օսմանյան կայսրության համար, այլ նաև ամբողջ աշխարհի (Ուինսթոն Չերչիլը՝ որպես գործողության նախաձեռնող, ստիպված է եղել հրաժարական տալ, իսկ Մուսթաֆա Քեմալը, որն ավելի ուշ ստացել է Աթաթուրք անունը, ապագայում դարձել է Թուրքիայի նախագահ)։
Ավստրալիայում և Նոր Զելանդիայում ապրիլի 25-ը կոչվել է Anzac Day և դարձել ազգային տոն։ Այդ օրերին ավստրալացի և նորզելանդացի զբոսաշրջիկներն այցելում են Գալիպոլիի թերակղզի, որտեղ անցկացվում են հիշատակի միջոցառումներ։
«Որպես հայերի, ամերիկացիների և նորզելանդացիների սերունդ, ում տատիկներն ու պապիկները եղել են չարագործությունների անմիջական ականատեսները, ես այդ օրը զբոսաշրջային ուղևորությունները Գալիպոլի համարել եմ թուրքական քարոզչության արդյունք։ Ես հարգում եմ իրենց զոհված հերոսներին հարգանքի տուրք մատուցող ընտանիքներին, սակայն չեմ վստահում ժամանակակից Թուրքիայի ղեկավարների մտադրություններին», - գրել է Թանկյանը։
Նա գրել է, որ այս շաբաթ Նոր Զելանդիայում մարդկությունը բախվել է ժամանակակից պատմության ամենասարսափելի դրվագներից մեկի՝ Քրայսթչերչի մզկիթներում Ավստրալիայի քաղաքացիություն ունեցող զինված անձի կողմից անմեղ հավատացյալներին կրակելու հետ:
«Հրաձգությունից հետո հայտնի դարձավ, որ Էրդողանը բազմիցս ցուցադրել է հրաձիգի խմբագրված տեսանյութը տեղական ընտրական հանրահավաքների ժամանակ և բացահայտ կերպով սպառնացել նորզելանդացիներին և ավստրալացիներին նմանօրինակ հայտարարություններով. «Ձեր տատիկներն ու պապիկները եկել են այստեղ, իսկ նրանցից ոմանք՝ վերադարձել դագաղների մեջ: Եթե դուք գաք ձեր պապիկների նման, վստահ եղեք, որ չեք վերադառնա, ինչպես ձեր պապիկները»,- հիշեցրել է Թանկյանը՝ մատնանշելով այն հանգամանքը, որ Էրդողանը այս տեսանյութը ցուցադրում է հանրությանը, որպեսզի լսարանի առաջ պատրանք ստեղծի, թե իբր աշխարհում իսլամատյացությունն ավելացել է և ընտրողներին գրավի դեպի իրեն:
Թանկյանը հարցնում, թե ե՞րբ է գալու ժամանակն ասելու՝ բավակա՛ն է:
«Մենք չենք պատրաստվում համաձայնել բռնակալի հետ առևտրի, աշխարհաքաղաքական առավելության կամ ռազմական ուղղաթիռների վաճառքի համար: Նոր Զելանդիան ԱՄՆ չէ, որ տուրք տա Թուրքիայի քմահաճույքներին, և պետք է առավել բարոյական ուղի ընտրի», - եզրափակել է Նոր Զելանդիայում գտնվող երաժիշտը:
