ԵՐԵՎԱՆ, 23 մարտի — Sputnik. Հիշվող ձայներ, վառ արտաքին ու ճկունություն. այս երեխաները պարզապես գերել են ռուս աստղերին` ռուսական հեռուստատեսության Առաջին ալիքի «Ձայնը. երեխաներ» շոուի մարզիչներին։
Sputnik Արմենիան ներկայացնում է նախագծի պատմության մեջ հայ երեխաների ամենավառ ելույթների տասնյակը։
Ռոբերտ Բագրատյան
Դոնի Ռոստովում ապրող Ռոբերտ Բագրատյանի ելույթը` Queen լեգենդար խմբի Show Must Go On երգի վիրտուոզ կատարումը, մինչ այժմ հանդիսատեսի մտքում է` ինչպես Ռուսաստանում, այնպես էլ Հայաստանում։
Ռոբերտն անցել է «կույր լսումների» փուլն ու ընդգրկվել է ուկրաինացի Սվետլանա Լոբոդայի թիմում։
Վիկտորյա Անտոնյան
Մեկ այլ հայ աստղ` 13–ամյա Վիկտորյա Անտոնյանը, «Ձայնը, երեխաներ» շոուի հինգերորդ սեզոնում գրավել է ռեփեր Բաստայի սիրտը «Զենք ու զրահով երեխաները» մյուզիքլից My Funny Valentine ջազային երգի կախարդական կատարմամբ` այսպիսով անցնելով կույր լսումների փուլը։
Վիկտորյան նկարչությամբ է զբաղվում, երգում է երգչախմբում ու բազում այլ հոբիներ ունի։
Ռոբերտ Կասյան
Շոուի նույն հինգերորդ եթերաշրջանում փայլել է նաև 13–ամյա Ռոբերտ Կասյանը Կրասնոդարից։ Կույր լսումների ընթացքում ժյուրիի բոլոր անդամները շրջվել էին։ Նա կատարել է «Parlami d"amore, Mariu» բարդ երգը։
Էլեն Բադալյան
11 տարեկան Էլեն Բադալյանը Մոսկվայից «Ձայնը. երեխաներ» նախագծի վեցերորդ եթերաշրջանում կատարել է Սթիվի Ուանդերի «Don"t You Worry "Bout a Thing» երգը։ Աղջիկը պարզապես ոտքի է հանել ժյուրիի ապշած անդամներին։
Ալեքսանդրա Խարազյան
«Ձայնը. երեխաներ» եթերաշրջաններից մեկի ժամանակ ուշադրության կենտրոնում էր հայտնվել 10 տարեկան Ալեքսանդրա Խարազյանը Մոսկվայից։ Նա հիշվել է իր գեղեցիկ ելույթներով, անչափ արտահայտիչ աչքերով ու Էդիթ Պիաֆի «Padam, padam» երգի կատարմամբ։
Կարինա Իգնատյան
Տասնամյա Կարինա Իգնատյանը Կալուգայից հիացրել է «Ձայնը. երեխաներ» շոուի չորրորդ եթերաշրջանի ժյուրիի անդամներին կույր լսումների ընթացքում։ Աղջիկը կատարում էր Բիլ Ուիզերսի «Just the Two of Us» երգը։ Կարինանն զբաղվում է ոչ միայն երգով, այլև պարով։ Սակայն դա չի խանգարում նրան դպրոցում գերազանց սովորել։
Կարինե Մեհրաբյան
Յոթ տարեկան Կարինե Մեհրաբյանը շոուի նույն չորրորդ եթերաշրջանում գրավել է երգչուհի Նյուշայի սիրտը։ Փոքրիկ Կարինեն կատարել է «Я деревенская» ուրախ երգը, ու պետք է նշել, որ արել է դա իսկապես ժողովրդական եռանդով ու պարզամտությամբ։ Նա չէր կաշկանդվել ո՛չ բեմից, ո՛չ հանդիսատեսից, ո՛չ դատավորներից` ի դեմս ռուսական էստրադայի վարպետների։
Արտյոմ Սեյրանյան
Տասներեքամյա Արտյոմ Սեյրանյանը չորրորդ եթերաշրջանի կույր լսումների ընթացքում համարձակվել է երգել AC/DC խմբի «Highway to hell» երգը։
Արտյոմն այնքան մեծ ոգևորությամբ է կատարել այն, որ միանգամից ստիպել է դատավոր Դիմա Բիլանին շրջվել։ Ժյուրիի անդամները հաճույքով հետևում էին նրա ելույթին։ Տղան շատ վստահ էր բեմի վրա ու հիանալի զգում էր ռիթմը։ Ելույթից հետո դահլիճը բղավում էր` կեցցես։
Սառա Աբրամյան
Աբխազիայում բնակվող երիտասարդ երգչուհի Սառա Աբրամյանն, անկասկած, ֆավորիտ է դարձել «Ձայնը. երեխաներ» երկրպագուների շրջանում։ Փորիկ երգչուհին գրավել է ոչ միայն մրցույթի ժյուրիի անդամների, այլև բազում մելոմանների սրտերը Պոլինա Գագարինայի «Драмы больше нет» հիթի կատարմամբ։
Լևոն Գալստյան
Տասնամյա Լևոն Գալաստյանը հրապուրել է «Ձայնը. երեխաներ» նախագծի ժյուրիի անդամներին հայտնի մուլտֆիլմի երգի կատարմամբ։ Ներկայումս Մոսկվայում բնակվող փոքրիկ երևանցին կատարել է Spider-Man երգը համանուն ֆիլմից։
