«Օպերայի տարածքի սրճարանների ապամոնտաժումը շատ ճիշտ քայլ է, ինչ-որ հնարավոր է, պետք է վերականգնել: Պետք է կանաչապատել նաև դեպի մոնումենտ բարձրացող սարալանջը, քանի այնտեղ էլ օլիգարխների դղյակներ չեն հայտնվել»,- «Տետ-ա-տետ» հաղորդման շրջանակներում այս մասին նշեցին Հանուն կայուն զարգացման ասոցիացիայի նախագահ, բնապահպան Կարինե Դանիելյանը և Գիտությունների ազգային ակադեմիայի բուսաբանության ինստիտուտի գլխավոր գիտաշխատող Գոհար Օգանեսովան:
Օպերայի շրջակայքի ապամոնտաժման մասով, ըստ բնապահպանի, հարցը դրված է ոչ միայն կանաչապատման, այլև հուշարձանի շրջակայքի բարելավման մասով:
«Մեկ-երկու տարի հետո մենք նոր, փոփոխված տարածք կունենանք: Մինչ սրճարանների կառուցումը մենք դեմ ենք եղել այդ տարածքների նման օգտագործմանը. նախ կանաչ տարածքը չի կարելի աղճատել, երկրորդ՝ օպերան այնպիսի շինություն է, որ կարելի է մի քանի թեթև սրճարան ունենալ, բայց ոչ համատարած, առավել ևս ոչ առաջին գոտում», -ասաց Դանիելյանը:
Հարցին, թե չի խանգարի արդյո՞ք ստորգետնյա ավտոկայանատեղիի առկայությամբ հնարավոր է ունենալ խիտ կանաչապատ տարածք ու խորը արմատներով ծառեր և ստանալ նախկին տեսքը, Գոհար Օգանեսովան. «Ճիշտ է, այնտեղ չենք ունենա հսկա ծառեր, բայց կունենանք հեռանկար և կտեսնենք, որ հնարավոր է նույն տեսքի բերել մեր սիրած թատերական հրապարակը»:
Ըստ մասնագետների՝ երեք շերտով պետք է լինի կանաչապատումը՝ ծառ, թուփ և խոտային ծածկ: Հատկապես, ըստ մասնագետների այնտեղ կարելի է տնկել հուդայածառ, եղևնի, կեչի և այլն:
«Ամեն ինչ լավ է, երբ օրենքով է: Եթե մենք ուզում ենք օրենքի երկիր դառնանք, պետք է պահպանվեն օրենքի պահանջները: Ես կառաջարկեի ուշադրություն դարձնել այն լանջերին, որոնք գնում են, օրինակ, Մոնումենտ, սարսափելի վիճակում են: Եվ այնտեղ մեծ հնարավորություններ կան կանաչապատում անել՝ առանց մտածելու՝ արմատն ուր կգնա: Դա մեծ տարածք է, այնտեղի փոշին, ազատ հողը գալիս է դեպի քաղաք», -ասաց Օգանեսովան:
Կարինե Դանիելյանը էլ նշեց, որ դեպի Սարի թաղ այդ լանջերի շարունակությունը դեռ կառուցապատված չէ, կառավարության որոշումով դրանք բոլորը բաժանված են: Քանի դեռ կառուցապատում չի եղել, այդտեղ հարցը կարելի է լուծել և ուսումնասիրել պայմանագրերի բնույթը: Նա նշեց, որ պայմանագրերն այնպես են կազմված, որ քաղաքապետարանը, երբ ցանկանա, կարող է խզել դրանք: «Հիմա պետք է նայել լանջերի խնդիրները, դրանք տրվել են օլիգարխներին, և կանաչապատում չի եղել, մութ ու ցուրտ տարիներին հատվել են այդ անտառածածկ տարածքները, սակայն վերականգնվելու փոխարեն տրվել են օլիգարխներին, այդ որոշումը պետք է վերանա»:
Քաղաքային իշխանությունն ամեն դեպքում պետք է ոսկե միջինը գտնի, որպեսզի հնարավոր լինի խուսափել նաև սոցիալ-տնտեսական բացասական հետևանքներից:
