ԵՐԵՎԱՆ, 20 մարտի — Sputnik. Որոշ պաշտոնյաներ, իմանալով, որ Մեղրիի տարածքը դառնալու է ազատ առևտրի գոտի, նախապես սեփականաշնորհել են դրանք։ Այսօր հրավիրված ասուլիսի ժամանակ այս մասին ասաց ՀՀ տարածքային կառավարման և զարգացման նախարար Սուրեն Պապիկյանը։
Նրա խոսքով` խնդրի առնչությամբ դեռ պետք է ուսումնասիրություններ կատարվեն։
«Մեղրի ազատ առևտրի գոտու տարածքում մարդիկ հողեր են սեփականաշնորհել չնչին գումարներով, լումաներով։ Հենց այդ տարածքների սեփականաշնորհումն էլ հետագայում կասեցրել է Մեղրիի` ազատ առևտրի գոտի դառնալուն։ Սա ազգային անվտանգության և պետական շահի խնդիր է։ Ինչպես հայտարարել է վարչապետը` այն ամենը, ինչը պատկանում է ՀՀ–ին և ՀՀ քաղաքացուն, պետք է հետ վերադարձվի։ Մենք մեր իրավասության շրջանակներում` կդիմենք համապատասխան ատյաններ, որպեսզի պետությանը պատկանող տարածքները հետ վերադարձվեն»,–ասաց նախարարը։
Նա հավելեց նաև, որ չի կարող անուններ հնչեցնել, քանի դեռ ուսումնասիրությունները չեն ավարտվել։
Նախարարի խոսքով` ավազի հանքերն էլ պաշտոնյաների` պաշտոնեական դիրքը չարաշահելու արդյունքում են սեփականաշնորհվել կամ էլ գուցե տարբեր կեղծ աճուրդների միջոցով։ Պապիկյանն իր խոսքն ամփոփեց` ասելով, որ առավել մանրամասն այս մասին կխոսի, երբ իրավապահ մարմինները կավարտեն ուսումնասիրությունները։
Հիշեցնենք` ոստիկանությունն ավելի վաղ հաղորդագրություն էր տարածել` նշելով, որ 2014թ. Սյունիքի մարզի Կարճևան համայնքում ազատ տնտեսական գոտի ստեղծելու գործընթացի ժամանակ նույն համայնքի ղեկավարի և այլ պաշտոնատար անձանց կողմից թույլ են տրվել չարաշահումներ:
