«Աբովյանի քաղաքապետարանն աճուրդով օտարել է համայնքային ենթակայության 60-ից ավելի հողակտորներ, որոնց գրեթե կեսի համար սահմանվել է կադաստրային արժեքի հիսուն տոկոսի չափով մեկնարկային գներ»,-փաստում է Կոտայքի մարզպետ Ռոմանոս Պետրոսյանը։
Ըստ մարզպետի, առնվազն խելամիտ չէ նման ծավալով հողերի օտարումը, այն էլ՝ կադաստրային արժեքի 50% մեկնարկային գնով։
«Մարզի դատախազությանն առաջարկել եմ ուսումնասիրություններ իրականացնել և օրենքով սահմանված ընթացք տալ թե՛ աճուրդների գործընթացին, թե՛ դրանց նախորդած գործողություններին։»,-մանրամասնում է պաշտոնյան։
Ըստ Ռոմանոս Պետրոսյանի, համայնքային սեփականություն հանդիսացող հողերի օտարումների գործընթացների իրականացումը պետք է կանոնակարգվի բացառապես ՀՀ օրենսդրությամբ և ցանկացած գործողություն, ինչի արդյունքում վնաս է հասցվել պետությանը, մարզի համայնքներին կամ քաղաքացիների օրինական իրավունքներին ու շահերին, արժանանալու է իրավական խիստ հակազդեցության։
