ԵՐԵՎԱՆ, 20 մարտի – Sputnik. Կան սկզբունքներ, որոնց հավատարիմ է մնում Հայաստանը, դեռ չի եկել այն փուլը, երբ կարելի է հայտարարել Հայաստանի ու Ադրբեջանի առաջնորդներ Նիկոլ Փաշինյանի ու Իլհամ Ալիևի հանդիպման մասին։ Այսօր կայացած ճեպազրույցի ժամանակ այս մասին ասաց ՀՀ ԱԳՆ մամուլի խոսնակ Աննա Նաղդալյանը;
«Դեռ այն փուլը չէ, երբ մենք կարող ենք համաձայնեցված հայտարարել հանդիպման մասին։ Մենք երբեք չենք խախտել այդ սկզբունքը։ Երբ հանդիպման մասին պայմանավորվածություն լինի, մենք կհայտարարենք դրա մասին։ Այս դեպքը բացառություն չէ», – ասաց Նաղդալյանը։
Նրա խոսքով` Հայաստանի ԱԳՆ–ն կապի մեջ է ԵԱՀԿ Մինսկի խմբի համանախագահների հետ և ընդունում է հակամարտության խաղաղ կարգավորման վերաբերյալ բոլոր ջանքերը։
Հիշեցնենք` վերջին անգամ ՀՀ վարչապետ Նիկոլ Փաշինյանն ու Ադրբեջանի նախագահ Իլհամ Ալիևը հանդիպել են հունվարին Դավոսում։
Ավելի վաղ Թեհրանում հայ համայնքի հետ հանդիպման ժամանակ Փաշինյանը նշել էր, որ մտադիր է առաջիկայում հանդիպել Ադրբեջանի նախագահի հետ։
