ԵՐԵՎԱՆ, 18 մարտի – Sputnik. Լոռու մարզի Մեծավան գյուղում կողոպտել են միայնակ ապրող 83 տարեկան կնոջը։ Մարտի լույս 17-ի գիշերը՝ ժամը 3-ի սահմանում, երկու հոգի մտել են տուն ու կողոպտել նրան։ Կինն ապրում է Սողոմոն Թեհլերյանի անվան փողոցում։
Sputnik Արմենիայի տեղեկություններով` այդ անձինք բակ են մտել ցանկապատի վրայով, իսկ տան դուռը բացել են զգուշորեն ապակին հանելուց հետո։ Թոշակառու կինը անկողնում է եղել, երբ մոտեցել են իրեն ձեռքերով ու կպչուն ժապավենով փակել բերանն ու աչքերը, որպեսզի տուժողը չտեսնի իրենց։ Տունը տակնուվրա են արել։ Փող են փնտրել նաև տատիկի անկողնում։
Հափշտակել են կնոջ խնայած 200.000 դրամից ավելի փողը, նաև 50 դոլար ու 15.000 ռուբլի։ Տուժողի մատից հանել են մատանին ու դա էլ տարել իրենց հետ։
Տան լույսերը չեն վառել, քանի որ թոշակառու կնոջ որդու տունը մոտ է։ Լույսը վառելու դեպքում նա կնկատեր ու կշտապեր մոր մոտ։ Տուն մտած անձինք դուրս գալուց պոկել են կնոջ բերանի կպչուն ժապավենը, ապա նոր հեռացել։
83-ամյա թոշակառուն էլ վառել է լույսերն ու զանգահարել որդուն։ Որդին ու թոռը եկել են օգնության և տեղեկանալով կատարվածի մասին ահազանգել են ոստիկանություն։
