ԵՐԵՎԱՆ, 18 մարտի — Sputnik, Նելլի Դանիելյան. Կոտայքի մարզպետի ներկայացրած փաստերի հիման վրա քրեական գործեր են հարուցվել մարզի երկու գյուղապետների` Նոր Գեղիի` նախկին և Պտղնիի գործող գյուղապետների նկատմամբ։ Այս տեղեկությունը Sputnik Արմենիայի հետ զրույցում հայտնեց Կոտայքի մարզպետ Ռոմանոս Պետրոսյանը։
«Պետական վերահսկողական ծառայության ստուգումների հիման վրա քրեական գործ է հարուցվել Նոր գեղի համայնքի նախկին համայնքապետ Ֆրոնտիկ Թևոսյանի նկատմամբ։ Քրեական գործ է հարուցված նաև Պտղնի համայնքի ղեկավար Առաքել Վիրաբյանի նկատմամբ, որը երկար տարիներ ղեկավարել է այդ համայնքը։ Բայց համայնքը ո՛չ մանկապարտեզ ունի, ո՛չ մշակույթի կենտրոն, գտնվում է բավական անմխիթար վիճակում, չնայած որ Երևանից հեռու է երևի 2-3 կմ»,– ասաց մարզպետը։
Թե կոնկրետ ինչ փաստեր են բացահայտվել արդեն կատարված ուսումնասիրությունների արդյունքում, Կոտայքի մարզպետը չցանկացավ մանրամասնել` առաջարկելով սպասել նախաքննության ավարտին։ Միայն շեշտեց, որ ամենուր բացահայտվել են «հանրային և պետական շահերի յուրացումներ, անպատժելի գործունեություն, հանցավոր անփութություն»։
Գյուղապետերի նկատմամբ հարուցված քրեական գործերի փաստը Sputnik Արմենիայի հարցմանն ի պատասխան հաստատեց նաև ՀՀ Քննչական կոմիտեի տեղեկատվության և հասարակայնության հետ կապերի բաժնի պետ Նաիրա Հարությունյանը։
«Երկուսի դեպքում էլ հարուցվել քրեական գործեր՝ ՀՀ քրեական օրենսգրքի 308-րդ հոդվածի 1-ին մասի և 179-րդ հոդվածի 2-րդ մասի հատկանիշներով: Նշանակված են փորձաքննություններ»,– հայտնեց Հարությունյանը։
Իսկ թե կոնկրետ ինչ արարքների ու ինչ չափի չարաշահումների համար են մեղադրվում նախկին ու ներկա պաշտոնյաները, Քննչական կոմիտեից չեն հայտնում` նշելով, որ դա հայտնի կդառնա միայն իրականացվող փորձաքննությունների ավարտին։
Նշենք, որ գյուղապետներին առաջադրված մեղադրանքները ենթադրում են, որ վերջիններն իրենց պաշտոնեական դիրքն օգտագործելով յուրացում կամ վատնում են կատարել և չարաշահել իրենց պաշտոնեական լիազորությունները։
Ի դեպ, այս ամենից զատ, Նոր Գեղիի 32 տարվա գյուղապետ Ֆրոնտիկ Թադևոսյանի համբավը պաշտոնավարման վերջին տարում դուրս էր եկել գյուղի սահմաններից այն բանի շնորհիվ, որ նա իր անունով էր կոչել գյուղի արվեստի դպրոցն ու կենտրոնական փողոցը։ Այս հարցը ևս չի վրիպել Կոտայքի մարզպետի ուշադրությունից։ Ռոմանոս Պետրոսյանը որոշել է դիմել դատարան ավագանու այս որոշումները չեղարկելու պահանջով։
«Նոր Գեղիի ավագանուն առաջարկել եմ անվանափոխություն, սակայն առաջարկը մերժվել է, և օրենքով սահմանված կարգով այս որոշումն արդեն պետք է վիճարկեմ դատարանում։ Իսկ դատարանի որոշումից հետո արդեն համայնքի կորոշի, թե ում անունով կկոչվեն դպրոցն ու փողոցը»,- ասաց մարզպետը։
Հիշեցնենք, գյուղապետներից բացի այս պահին քրեական գործ է հարուցված նաև Հրազդան քաղաքի նախկին քաղաքապետ Արամ Դանիելյանի նկատմամբ։ Մարզի ղեկավարը հայտնեց, որ, ըստ քրեական գործի քաղաքապետն ու քրեական գործով մեղադրվող ևս 7 անձինք մեղադրվում են 680 մլն դրամի չարաշահումների համար։ Դրանից 138 մլն դրամը նախաքննության ընթացքում, մարզպետի տեղեկություններով, վերականգնվել է համայնքային բյուջե։
Սա, ըստ Ռոմանոս Պետրոսյանի, վկայում է այն մասին, որ առնվազն այս մասով նրանք ընդունել են իրենց առաջադրված մեղադրանքը։
