Ինչպես կպատասխանեին պաշտոնյաները Փաշինյանին, եթե չափածո դիմեին նրան

Բանաստեղծություն գրելու ունակությունը, իհարկե, լավ հատկանիշ է: Բայց երբեմն բանաստեղծելն էլ կարող է այլ տպավորություն թողնել:

Այ, օրինակ, վարչապետ Նիկոլ Փաշինյանը, Ռանչպար գյուղ կատարած այցի արդյունքներն ու տպավորությունները յուրովի ամփոփեց… «Ռանչպար» բանաստեղծությամբ: Դա դեռ ոչինչ: Բայց Նիկոլ Փաշինյանը նշեց, որ այդ ոտանավորը... «նաև հանձնարարական է պետական բոլոր մարմիններին՝ իրենց անելիքի էության ու բնույթի մասին»:

Այս հանձնարարականի պահը երևակայություն բորբոքեց ու մի պահ պատկերացրի, թե պետական մարմինները նույն ոգով ու ոճով արձագանքում են Նիկոլ Փաշինյանի չափածո հանձնարարականին։

Առողջապահության նախարար Արսեն Թորոսյանի երևակայական արձագանքը

Է՛լ ինչ անեմ, որ մարի
Ծխախոտի ծուխն անդարձ,
Որ շաքարը կոլայի
Դառնա հարկված լեղի, մաղձ...
Քո ակաթե աչքերում,
Վարչապետ իմ լուսամփոփ,
Միտքդ՝ դուխով, հոգիդ՝ բո՛րբ...
Որքան երազ կա ու որքան թրթիռ,
Դառնա թող երկնագույն... ուղղաթիռ:

Ֆինանսների նախարար Ատոմ Ջանջուղազյանի ենթադրյալ արձագանքը

Բրոնզե տուրք է,
Բյուջեի քուրք է,
Հարկային բուք է,
Հարկահավա՛ք:
Դու դուխով փառք ես,
Ֆեյսբուքված լայք ես,
Դու լայվի փայլ ես,
Ու լրիվ ֆիսկալ,
Ի՛մ վարչակալ...
Բայց դու զուր ես,
Ա՜խ, իզուր ես,
Ներդրում սպասում
Օ՜, սրտիս քայլ...
***
Անողոք մորմոք կա, որ հոգիս կըտանջե,
Ախր մենք ոնց ենք լցնելու բյուջեն...

ԱԱԾ-ի «գաղտնալսված» արձագանքը չափածո հանձնարարականին

Մուտիտ ենք անում ու գաղտնալսվում,
Դարի պոետիկ շնչին ենք քսվում,
Նախկինից գործեր վերհանում բոլ-բոլ,
Ազատ ժամանակ խաղում ենք ֆուտբոլ...

Երևանի քաղաքապետ Հայկ Մարությանի երևակայական արձագանքը

Եթե ուզենք, կապամոնտաժենք սրճարաններ,
Եթե ուզենք, վերելակներ կընդարձակենք,
Եթե ուզենք, կդարձնենք բոշի բազար,
Մի գործազո՞ւրկ էր, կդառնա... հազար:

ՊԵԿ-ի ղեկավար Դավիթ Անանյանի ենթադրյալ արձագանքը

Կուզեմ հիմի փչե զուռնեն - հարկեր հավքիմ մինչև էգուց.
Տնտեսության բըկին չոքեմ, որ մառ մզվի մինչև էգուց:

ըՍտուգումով մտնեմ քուչեն, անՀԴՄ վրես նայես՝
Դու տուգանված գիրկս ընկնես, ես լաց չըլիմ մինչև էգուց:

Խելքս անդարդ ոտքիդ տված՝ երթամ ընկնեմ մոլ ու մարկետ
Քո բյուջեին գինի ու հա՛ց ըլիմ, դուխով իմ վարչապե՛տ:

Պարգևավճար ինձ դուրս գրեմ, ու հարկերը բերեմ տաք-տաք,
Թավշյա շնչով անկոռուպցիա թռվռամ ես մինչև... չերթանք:

Ոստիկանապետ Վալերի Օսիպյանի ենթադրյալ չափածո արձագանքը հանձնարարականին

Վերջապես առանք բռնության կարոտը,
Ցույցը ցրեցինք, ջարդինք մեկի ոտը...
Էլի առաջվանն ենք, մահակով ու նույնը,
Մենք՝ իշխանության միակ հենասյունը:

Մշակույթի նախարարության հավաքական արձագանքը

Աջը թողած, թարսում էինք միշտ, խառնում թատրոն ու թանգարան,
Մինչև մեզ էլ կրճատումով փողոց հանեն՝ շարվեշարան:
Եվ Մակունցին մեր աննման անգամ չասած մնաս բարով
Պիտի անցնենք Կը-Գը-Նը-ի սառն ու անդուր սենյակներով…

Մեր դեմ գործեր, նախագծեր, միացումներ՝ հազա՜ր-հազա՜ր.
Զը-Լը-Մը-ներն են աղմկում, թավշյա կյանքը անհավասար.
Եվ ո՞վ կասի՝ ինչո՞ւ հենց մենք, էս ո՞ւր հասանք
Միաձուլումն անգութ այնպես՝ կարծես շինված է տապարով:

Ու էլ որո՞ւ մեղքի համար տուժենք այսպես մենք աններում,
Պիտի քայլենք, թողնենք-թռնենք, ՅՈՒՆԵՍԿՕ-ն է հեռվից գերում:
Թե Մակունցին տեսնեք մի օր ՀՀ ԱԺ միջանցքներում
Ասե՛ք նրան՝ մշնախն ասավ - մնաս բարո՜վ, մնաս բարո՜վ...