ԵՐԵՎԱՆ, 16 մարտի – Sputnik. «Բարգավաճ Հայաստան» կուսակցության պատգամավոր Նաիրա Զոհրաբյանն ու նրա գործընկերները «Զինվորական ծառայության և զինծառայողի կարգավիճակի մասին» օրենքում փոփոխություն են առաջարկել, որ այսուհետ 18 տարեկան անփորձ երիտասարդին զինծառայության անցնելուց անմիջապես չտանեն մարտական հերթապահության, դիրքեր` առաջնագիծ: Զոհրաբյանն այս մասին գրել է Facebook սոցիալական ցանցի իր էջում։
«Առաջնագծում մարտական հերթապահություն պետք է իրականացնեն պայմանագրային, փորձառու զինվորները, ովքեր գիտեն` ինչ է առաջնագիծը, երբ մի քանի հարյուր մետր այն կողմ թշնամու դիրքերն են: Միայն մեկ տարի զինվորական փորձառություն անցնելուց հետո թույլատրել զինվորին տանել մարտական հերթապահության: Սա մեր սկզբունքային դիրքորոշումն է: Չի կարելի 18 տարեկան անփորձ երեխային կանգնեցել առաջնագծում, և վերջ»,– նշել է Զոհրաբյանը:
Պատգամավորն ընդգծել է նաև, որ իհարկե, կա հարցի նաև մեկ այլ կարևոր կողմ` պայմանագրային զինծառայողների աշխատավարձի հարցը:
«120-130 հազար դրամով չես կարող ապահովել այնքան պայմանագրային զինծառայող, որ ողջ առաջնագծի հարցը լուծենք: Կարծում եմ` հնարավոր է գտնել պայմանագրային զինվորների աշխատավարձը ավելացնելու ֆինանսական միջոցներ և դա պետք է արվի հրատապ»,–գրել է նա` հիշեցնելով, որ Զինված ուժերում աշխատավարձերը 10 տոկոսով ավելացնելու մի տարբերակ երեկ իր ֆեյսբուքյան էջում առաջարկել էր Նիկոլ Փաշինյանը:
Հիշեցնենք` ՀՀ վարչապետը երեկ` մարտի 15-ին, ներկայացրել էր Հայաստանում աղքատ համարվող և նպաստ ստացողների թիվը` նշելով, որ նրանք ամսական 100 հազար դրամ և ավելի վարկ են փակում։ Այդ ավելի քան 11 հազար մարդկանց նպաստ տալու համար պետությունը ծախսում է տարեկան մոտ 4.5 միլիարդ դրամ: «Ասեմ, որ զինված ուժերում աշխատավարձերը 10 տոկոսով բարձրացնելու համար տարեկան հարկավոր է 9 միլիարդ դրամ: Հիմա՝ ի՞նչ եք ասում, սիրելի հայրենակիցներ, մեր վերը հիշատակված 11 հազար 281 հայրենակիցները պե՞տք է զրկվեն նպաստից, թե ոչ»,– հարց էր ուղղել Փաշինյանը:
Նրա գրառմանը հաջորդել էին մեկնաբանությունները։
Ոմանք նշել են, որ նպաստառուների գործերը պետք է հատ–հատ ստուգել։ Եթե պարզվի, որ նրանք խաբեությամբ են գումար ստանում, պետք է պատժել։ Ոմանց հետաքրքրել է, թե 40 հազար դրամ ստացող նպաստառուին ինչպես են վարկ տվել։
