ԵՐԵՎԱՆ, 14 մարտի — Sputnik. Երևանի ընդհանուր իրավասության դատարանում մարտի 14–ին քննվում է նախկին նախագահ Ռոբերտ Քոչարյանի կալանքը երկարացնելու մասին քննության միջնորդությունը։
Դատարանը դեռ չորեքշաբթի սկսել էր քննել հատուկ քննչական ծառայության ներկայացրած միջնորդությունը, սակայն Քոչարյանը ներկա չէր եղել։ Փաստաբան Հայկ Ալումյանի խոսքով` նախկին նախագահը նպատակահարմար չէր համարել մասնակցել։
Հիշեցնենք, որ 2019թ-ի հունվարի 18–ին առաջին ատյանի դատարանի որոշմամբ բավարարվել էր Հատուկ քննչական ծառայության քննիչի միջնորդությունը՝ Ռոբերտ Քոչարյանին կալանքի տակ պահելու ժամկետը երկարացնելու վերաբերյալ:
Դատարանի հիշյալ որոշման դեմ պաշտպանական խումբը վերաքննիչ բողոք էր ներկայացրել, որը սակայն Վերաքննիչ դատարանի փետրվարի 7-ի որոշմամբ մերժվել էր:
Հիշեցնենք նաև, որ ՀՀ 2–րդ նախագահ Ռոբերտ Քոչարյանը հուլիսի 26-ին Հատուկ քննչական ծառայություն էր ներկայացել «Մարտի 1»-ի գործով վկայի կարգավիճակով՝ հարցաքննության։ Նույն օրը նրան մեղադրանք էր առաջադրվել ՀՀ քրեական օրենսգրքի 300.1-ին հոդվածի 1-ին մասով այն բանի համար, որ նա այլ անձանց հետ նախնական համաձայնությամբ տապալել է Հայաստանի Հանրապետության սահմանադրական կարգը։
