ԵՐԵՎԱՆ, 6 մարտի — Sputnik. ՀՀ քաղաքացի Կարեն Ղազարյանը ոչ թե գերեվարված է Ադրբեջանի կողմից, այլ ձերբակալված, ինչը էականորեն բարդացնում է նրան Հայաստան վերադարձնելու խնդիրը։ Այս մասին այսօր Ազգային ժողովում կառավարության հարց ու պատասխանի ժամանակ ասաց ՀՀ Արդարադատության նախարար Արտակ Զեյնալյանը` պատասխանելով «Լուսավոր Հայաստան» խմբակցության պատգամավոր Սարգիս Ալեքսանյանի հարցին։
Զեյնալյանը հայտնեց, որ Կարեն Ղազարյանի հարցով գանգատ է ներկայացվել ՄԻԵԴ, և Հայաստանն այդ գործով կներգրավվի որպես երրորդ կողմ։
«Դրանից բացի, ՀՀ-ն գործադրում է դիվանագիտական և հումանիտար բոլոր միջոցները, որպեսզի Կարեն Ղազարյանի կյանքի անվտանգությունն ապահովվի»,– ասաց Զեյնալյանը։
Նախարարի խոսքով, առաջարկ է եղել նաև փոխանակելու Կարեն Ղազարյանին, բայց, ըստ Զեյնալյանի, Հայաստանում նման կարգավիճակում գտնվող Ադրբեջանի քաղաքացիներ չկան։
«Մենք գտնում ենք, որ Կարենն ապօրինաբար է գտնվում անազատության մեջ և այն ինչ վերագրվում է Կարենին, չի համապատասխանում իրականությանը»,- ասաց Զեյնալյանը։
Հիշեցնենք` Տավուշի մարզի Բերդավան գյուղի բնակիչ 34-ամյա Կարեն Ղազարյանը նախորդ տարվա հուլիսի 15-ին էր հայտնվել Ադրբեջանի տարածքում:
Ադրբեջանական կողմը տեղեկություն էր տարածել «սահմանին Հայաստանի ԶՈւ հետախուզադիվերսիոն խմբի հարձակման կանխման», ինչպես նաև 1984 թվականի ծնված հայ զինծառայող Կարեն Ղազարյանի գերեվարման մասին:
Հայաստանի պաշտպանության նախարարի մամուլի խոսնակ Արծրուն Հովհաննիսյանը հայտարարել էր, որ Կարեն Ղազարյանը չի ծառայում և երբեք չի ծառայել Հայաստանի ԶՈւ շարքերում:
2019թ.–ի փետրվարի 27–ին Ադրբեջանի դատարանը ՀՀ քաղաքացի Կարեն Ղազարյանին դատապարտեց 20 տարվա ազատազրկման։
