ԵՐԵՎԱՆ, 3 մարտի — Sputnik. «Քաղաքացիական գիտակցության զարգացում․եվրասիական տարածության պետությունների փորձը» միջազգային գիտակրթական դպրոցի շրջանակում Դիլիջանում դասախոսությամբ հանդես եկավ Sputnik Արմենիա տեղեկատվական գործակալության և ռադիոյի ղեկավար Դմիտրի Պիսարենկոն։ Դասախոսություն-քննարկումը նվիրված էր «ԶԼՄ-ների դերը քաղաքացիական գիտակցության ձևավորման մեջ» թեմային։
Դիլիջանում «Քաղաքացիական գիտակցության զարգացումը․ եվրասիական տարածության պետությունների փորձը» միջազգային գիտակրթական դպրոցի բացումը տեղի է ունեցել փետրվարի 28-ին։ Միջոցառումը կտևի մինչև մարտի 4-ը։ Դպրոցի մասնակիցներ են դարձել 40 երիտասարդներ, որոնք ներկայացնում են ԱՊՀ երկրները։ Նրանցից յուրաքանչյուրն ակտիվ դեր է խաղում իր երկրի երիտասարդական քաղաքականության մեջ։ Դպրոցի հիմնական նպատակը եվրասիական տարածությունում ընթացիկ իրավիճակի իմաստավորումն է։ Փորձագետները և մասնակիցները միասին քննարկում են եվրասիական տարածությունում քաղաքացիական գիտակցության զարգացման հետ կապված իրավիճակը։
«Կարևոր էր լսել, որ դպրոցի մասնակիցներն ակտիվորեն հետաքրքրվում են մեդիայի աշխատանքով և հասկանում, թե դա որքան լուրջ գործիք է քաղաքացիական գիտակցության ձևավորման գործում», - ասաց Դմիտրի Պիսարենկոն։
Պիսարենկոյի խոսքով՝ նա հաճելիորեն զարմացած էր, որ դպրոցի մասնակիցները լավ տեղյակ են Sputnik Արմենիայի գործունեությունից։
Նշենք, որ Պիսարենկոյի հետ միասին բանավեճ-դասախոսությանը մասնակցում էր նաև լրագրող, քաղաքական մեկնաբան Հայկ Խալաթյանը։
Հիշեցնենք, որ «Քաղաքացիական գիտակցության զարգացումը․ եվրասիական տարածության պետությունների փորձը» միջազգային գիտակրթական դպրոցը հնարավորություն է տալիս 3-4-րդ կուրսերի ուսանողներին, մագիստրոսներին, ասպիրանտներին և հասարակական գիտությունների ոլորտում մինչև 30 տարեկան մասնագետներին Հայաստանից և հետխորհրդային տարածքի պետություններից գնահատել քաղաքացիական արժեքների ազդեցության մակարդակը նախկին խորհրդային հանրապետություններում հասարակական կյանքի վրա։ Կազմակերպիչներն են Ռուս-հայկական երիտասարդական միությունը և Center of Public Diplomacy-ն՝ Գորչակովի հիմնադրամի աջակցությամբ։
