ԵՐԵՎԱՆ, 28 փետրվարի – Sputnik. Քանի որ Երևանի «Շտապբուժօգնություն» ՓԲԸ-ի ավտոպարկը նորացվել ու համալրվել է նոր ավտոմեքենաներով, իսկ մարզերում դրանք գրեթե չկան, առողջապահության նախարարությունն առաջարկում է շտապօգնության հին ավտոմեքենաները նվիրել մասնավոր հիվանդանոցներին։
Նման որոշում այսօր կայացրեց ՀՀ կառավարությունն իր հերթական նիստում` առողջապահության նախախար Արսեն Թորոսյանի առաջարկով։
Որոշման համաձայն` «Շտապբուժօգնություն» ՓԲԸ-ի «Ֆորդ-Տրանզիտ» մակնիշի մեքենաներից 21–ը վերաբաշխվելու են բժշկական օգնություն իրականացնող կազմակերպությունների միջև, իսկ 9–ը ամրացվելու են Առողջապահության նախարարությանը` հետագայում ըստ անհրաժեշտության դրանք տնօրինելու նպատակով:
Ի դեպ, որոշման մեջ արդեն իսկ նշված է, որ դրանցից մեկն անհատույց կտրամադրվի Երևանի «Նաիրի» բժշկական կենտրոնին:
Հիշեցնենք` Հայաստանի շտապօգնության ավտոմեքենաների կազմը նորացվել է Չինաստանից նվեր տրված ավտոմեքենաների շնորհիվ։ 2010 թվականին ստորագրված պայմանագրով Հայաստանին էր նվիրաբերվել 68 շտապօգնության ավտոմեքենա և 20 ռեանիմոբիլ` օժանդակ սարքավորումներով: Եվս 35 ավտոմեքենա չինական կողմը Հայաստանին է փոխանցել 2011թ–ին և 49–ը` 2018-ին։
