ԵՐԵՎԱՆ, 27 փետրվարի — Sputnik. Մարդու իրավունքների պաշտպան Արման Թաթոյանը պարզաբանումներ է պահանջել Երևանի քաղաքապետ Հայկ Մարությանից ու տարածքային կառավարման և զարգացմանի նախարար Սուրեն Պապիկյանից` ԶԼՄ-ներին պետության կողմից անհատույց տրամադրած տարածքներն ազատելու նրանց պահանջի իրավաչափության վերաբերյալ։ Այս մասին հայտնում են ՀՀ ՄԻՊ գրասենյակից։
Մարդու իրավունքների պաշտպանի աշխատակազմում սեփական նախաձեռնությամբ քննարկման ընթացակարգ է սկսվել Երևանում գործող լրատվամիջոցներին պետության կողմից անհատույց տրամադրված տարածքներից ազատելու իրավաչափության առնչությամբ՝ հաշվի առնելով, որ հարցն առնչվում է լրատվամիջոցների գործունեությանը»,– նշված է հաղորդագրության մեջ։
Հաշվի առնելով, որ կարծիքի արտահայտման ազատության երաշխավորումն ու լրագրողի գործունեության պաշտպանվածությունը Մարդու իրավունքների պաշտպանի համար ունի կարևորագույն նշանակություն՝ Արման Թաթոյանը պարզաբանումներ է պահանջել Երևանի քաղաքապետից, Տնտեսական զարգացման և ներդրումների նախարարից՝ առաջադրելով կոնկրետ հարցադրումներ:
Հիշեցնենք` Երևան քաղաքի Բուզանդի 1/3 հասցեում անհատույց տարածքներ ստացած լրատվամիջոցները հայտարարել են, որ Երևանի քաղաքապետարանից ծանուցումներ են ստացել զբաղեցրած տարածքներն ազատելու վերաբերյալ։
Նույնաբովանդակ գրություններ են ստացել նաև Երևանի Արշակունյաց 2 և Իսահակյան 28 հասցեներում գործող լրատվամիջոցները` ՀՀ Տնտեսական զարգացման և ներդրումների նախարարությանը ենթակա պետական գույքի կառավարման կոմիտեից։
