ԵՐԵՎԱՆ, 20 փետրվարի — Sputnik. ՀՀ գլխավոր դատախազությունը բողոք է ներկայացրել Վճռաբեկ դատարան` նախկին փոխվարչապետ Արմեն Գևորգյանին կալանավորելու պահանջով։
Այս մասին տեղեկությունները Sputnik Արմենիայի հետ զրույցում հաստատեց դատախազության հանրային կապերի բաժնի պետ Արևիկ Խաչատրյանը։
Վճռաբեկ դատարանի նիստի օրն, ըստ Խաչատրյանի, այս պահին հայտնի չէ։
Նրա խոսքով, ՀՀ դատախազության կողմից վճռաբեկ բողոք է ներկայացվել վերաքննիչ դատարանի` հունվարի 29-ի որոշման դեմ։
Դրանով, հիշեցնենք, Վերաքննիչ դատարանը մերժել էր դատախազության միջնորդությունը և անփոփոխ թողել Երևան քաղաքի ընդհանուր իրավասության դատարանի որոշումը` Արմեն Գևորգյանին կալանավորելու ՀՔԾ-ի միջնորդությունը մերժելու վերաբերյալ։
Հիշեցնենք` Արմեն Գևորգյանին մեղադրանք էր առաջադրվել Մարտի 1-ի քրեական գործի շրջանակում։ Ինչպես լրագրողներին հայտնել էր ՀՔԾ պետ Սասուն Խաչատրյանը, մեղադրանքը սահմանադրական կարգը տապալելու հոդվածով չէ, այլ արդարադատության իրականացումը խոչընդոտելու`ՀՀ քրեական օրենսգրքի 332 հոդվածի 3-րդ մասով:Մեղադրանքը հիմնված է` Wikileaks-ի այն հրապարակմանը, որի համաձայն` Սահմանադրական դատարանի դատավոր Վալերի Պողոսյանի նկատմամբ ճնշում է եղել, նա բողոքել է, ասել է՝ Ռոբերտ Քոչարյանի աշխատակազմից իր վրա ճնշում կա, որ ինքը որոշում կայացնի Սերժ Սարգսյանին օգտին: Ըստ ՀՔԾ պետի` վիքիլիքսյան հրապարակումը հիմնավորվել է. Արմեն Գևորգյանը մեկ այլ պաշտոնյայի հետ միասին, փորձել է ճնշում գործադրել ՍԴ դատավոր Վալերի Պողոսյանի վրա։
Այս մեղադրանքով Արմեն Գևորգյանին 6 տարվա ազատազրկում է սպառնում։
Նրա նկատմամբ նախապես կիրառվել էր չհեռանալու մասին ստորագրություն:
2018 թ.-ին Արմեն Գևորգյանը ՀՀ փոխվարչապետն էր: Մինչ այդ տարբեր ժամանակահատվածներում նա աշխատել է որպես ՀՀ նախագահի աշխատակազմի ղեկավար, նախագահի առաջին օգնական, փոխվարչապետ, տարածքային կառավարման նախարար: 2007-2008 թթ.-ին, ինչպես նաև 2016թ.-ի հունիսից հոկտեմբեր եղել է Ազգային անվտանգության խորհրդի քարտուղար:
2018թ–ի դեկտեմբերի 14–ին Երևանի Նոր Նորք համայնքի ընդհանուր իրավասության դատարանը մերժեց ՀՀ նախկին փոխվարչապետ, անվտանգության խորհրդի քարտուղար Արմեն Գևորգյանին կալանավորելու մասին նախաքննական մարմնի միջնորդությունը։ Նախաքննական մարմինը որոշումը բողոքարկել է Վերաքննիչ դատարանում։
Արմեն Գևորգյանն իրեն առաջադրված մեղադրանքը չի ընդունում։
