ԵՐԵՎԱՆ, 20 փետրվարի — Sputnik. 1988 թվականի այս օրը՝ փետրվարի 20-ին, տեղի ունեցավ մի իրադարձություն, որ պատմական էր բոլոր առումներով։ ԼՂԻՄ-ի մարզային խորհուրդը որոշում ընդունեց մտնել Հայաստանի կազմի մեջ։
Ասված է ՀՀ վարչապետ Նիկոլ Փաշինյանի` արցախյան շարժման սկզբնավորման առիթով շնորհավորական ուղերձում։
Փաշինյանը հիշեցնում է, որ արցախցիների որոշմանն ամբողջական աջակցություն հայտնեց Հայաստանի ժողովուրդն ու Սփյուռքը։
«1988 թվականի փետրվարի 20-ը հայոց ազգային վերազարթոնքի մի բացառիկ օրինակ էր, որ ոգեշնչեց միլիոնների։ Մենք վերագտանք մեր ազգային միասնությունը, միակամությունը, վճռականությունը։ Հայաստանում և Արցախում ձևավորվեց մի համաժողովրդական շարժում, որ բացառիկ էր իր թափով և անկասելիությամբ, խորապես ազգային էր և միաժամանակ խորապես ժողովրդավարական»,– ասված է ուղերձում։
Ժողովրդական միասնության ու շարժման հիմքում, Փաշինյանի խոսքով, ազգերի ինքնորոշման իրավունքն ու ժողովրդավարական ազատություններն էին։ Իր պայքարի ճանապարհին հայ ժողովուրդը համոզված էր, որ ազատությունն ու անկախությունը անսակարկելի արժեքներ են։
«30 տարի անց՝ 2018 թվականի գարնանը մենք իբրև ժողովուրդ, իբրև հասարակություն և իբրև պետություն, կրկին ապրեցինք մի նոր՝ հեղափոխական զարթոնք՝ կրկին ոտքի կանգնելով այն գաղափարների համար, որոնք թանկ են յուրաքանչյուրիս համար։ Մենք ապացուցեցինք նախ ինքներս մեզ, ապա աշխարհին, որ արժանապատիվ և հայրենասեր քաղաքացիներն ենք մեր երկրի, որ հավատարիմ ենք մեր պայքարին և իդեալներին, հավատարիմ ենք Հայաստանի և Արցախի բռնած ազատության ճանապարհին»,– ասված է Փաշինյանի շնորհավորական ուղերձում։
1988թ.–ի փետրվարի 13-ից Ստեփանակերտի կենտրոնական հրապարակում հանրահավաքներ էին ընթանում։ Արցախի ժողովուրդը պահանջում էր Արցախը դուրս բերել Ադրբեջանի կազմից և վերամիավորել Հայաստանին:
Փետրվարի 20-ին ԼՂԻՄ Մարզխորհուրդն արտահերթ նստաշրջան հրավիրվեց։ Որոշում կայացվեց դիմել Ադրբեջանական և Հայկական ԽՍՀ-ներին`ԼՂԻՄ-ն Ադրբեջանի կազմից դուրս բերելու և Հայաստանին միացնելու խնդրանքով։ Որոշվեց նաև դիմել ԽՍՀՄ Գերագույն խորհրդին` միջնորդելու արցախյան հարցի դրական լուծման համար:
