ԵՐԵՎԱՆ, 18 փետրվարի — Sputnik. Թաթարստանի Մուսա Ջալիլի անվան օպերայի և բալետի թատրոնի ղեկավարությունը խզել է օպերային երգիչ Խաչատուր Բադալյանի հետ ունեցած պայմանագիրը շատ տարօրինակ պատճառով:
Ինչպես տեղեկացնում է ՌԻԱ Նովոստին՝ հղում անելով «Պրեմիեր» արտ–գործակալության Բադալյանի ներկայացուցչին, պատճառը եղել է նրա կարճ հասակը։
Թատրոնը, աղբյուրի խոսքով, արտ–գործակալության հետ պայմանագիր էր կնքել Շալյապինի անվան միջազգային օպերային փառատոնի չորս նախագծերում Բադալյանի մասնակցության համար։ Տենորը պետք է ներգրավված լիներ երկու բեմադրության մեջ` «Մադամ Բատերֆլայ» և «Տրավիատա», և երկու գալա համերգներում։
Հայտնում են, որ Բադալյանի ելույթը փետրվարի 4-ին «Մադամ Բատերֆլայում» հիացական արձագանք է ստացել ոչ միայն հանդիսատեսի, այլև մամուլի կողմից։ Սակայն փետրվարի 8-ին թատրոնից զանգահարել են արտիստի ներկայացուցիչներին և հայտնել Բադալյանի ելույթի չեղարկման մասին` նրա «կարճահասակ» լինելու պատճառով (170 սմ), ինչպես նաև պայմանագիրը խզելու մտադրության մասին։
«Պրեմիերայի» ներկայացուցիչների խոսքով` իրենց գործակալությունը փորձել է կապ հաստատել թատրոնի տնօրենի հետ, սակայն նա այդ թեմայով իբրև թե չի խոսել։
«Պրեմիերայում» պայմանագիրը խզելու հայտարարված պատճառը «օպերային երգիչների աշխատանքի պրոֆեսիոնալ չափանիշների գնահատականին անհամապատասխան» են համարում։ Գործակալությունում նաև կարծում են, որ թատրոնի գործողությունները «խախտում է բարոյականության նորմերը, ինչպես նաև արտիստին հոգեբանական վնաս հասցնում»։
