Sputnik Արմենիայի թղթակիցները «Համով Հայաստան» խոհարարական նախագծի շրջանակում պատմում են, թե ինչպես արագ, և ամենակարևորը, համեղ պատրաստել հավի կրծքամիսը։ Այս հարցում մեզ օգնել է Երևանի ռեստորաններից մեկի շեֆ–խոհարար Գոռ Հակոբյանը։
Գոռը 23 տարեկան է։ Անկախ երիտասարդ տարիքից, նա խոհարարական ոլորտում հաջողությունների է հասել, չէ՞ որ դրանով արդեն 8 տարի է զբաղվում։ Խոհարար դառնալ Գոռը երազում էր մանկուց, նրան ոգեշնչել է հայրը, որը նույնպես շեֆ–խոհարար է։
«Մեր գործում ամենադժվարը չկարգավորված աշխատանքային գրաֆիկն է։ Վերջին հինգ ամսվա ընթացքում ընդամենը 3 անգամ եմ հանգստացել։ Սակայն դա էլ չի խանգարում, եթե սիրում ես գործդ», –Sputnik Արմենիայի թղթակցի հետ զրույցում ասում է Հակոբյանը։
Գոռը բազմաթիվ բաղադրատոմսեր գիտի, սակայն մեր նախագծի համար նա որոշեց ներկայացնել, թե ինչպես հավն ինքնատիպ պատրաստել, որպեսզի այն բուրավետ և ավելի համեղ լինի։ Ի դեպ, այս ուտեստը բավական պահանջված է ռեստորանի այցելուների շրջանում, սակայն նախևառաջ այն սիրում է ռեստորանի աշխատակազմը։
Սկզբում նախապատրաստենք բաղադրիչները. հավի միս, աղ, պղպեղ, ձիթապտղի ձեթ, բրոկոլի, բուլղարական պղպեղ, գազար, կախասունկ, հավի արգանակ։ Անցնենք պատրաստման։
Հավի կրծքամսին աղ ենք անում, վրան լցնում պղպեղ և ձիթապտղի ձեթ։ Կտրտում բրոկոլին, բուլղարական պղպեղը, գազարը և սունկը։ Ավելի արագ պատրաստելու համար կրակի վրա երկու թավա ենք դնում։ Թավաներից մեկում տապակում հավի կրծքամիսը, մյուսում` բանջարեղենը։
Երբ հավը կարմրում է, ավելացնում ենք ձեթը։ Շարունակում տապակելը։ Այնուհետև ավելացնում հավի արգանակը։ Ի դեպ, եթե արգանակ չկա, կարելի է փոխարինել եռացրած ջրով։ Շարունակում ենք տապակել, ապա գինով ենք պատում։ Հավը կարելի է նաև պատրաստել ջեռոցում։
Այնուհետև սոուս պատրաստում այն թավայի մեջ, որտեղ պատրաստում էինք հավը, այսինքն` արևածաղկի ձեթի, գինու և արգանակի մեջ սխտոր ենք ավելացնում։ Դա ուտեստին համեղ բույր է հաղորդում։ Խառնում ենք, ավելացնում դիժոնյան մանանեխ, սովորական մանանեխ, աղ, սպիտակ պղպեղ, սերուցք։ Խառնում ենք։ Կրծքամիսն ու բանջարեղենը դնում ափսեի վրա և վրան սոուս լցնում։
Մանրամասները դիտեք տեսանյութում։
Բարի ախորժակ։
