ԵՐԵՎԱՆ, 15 փետրվարի — Sputnik. Տնտեսական հեղափոխության կոնցեպտն ընկալված է Հայաստանի հանրության քաղաքացիների կողմից։ Այսօր ՀՀ կառավարության նիստի բացման խոսքում ասաց ՀՀ վարչապետ Նիկոլ Փաշինյանը` անդրադառնալով նախորդ 3 օրերին Ազգային Ժողովում քննարկված կառավարության ծրագրին ու դրա շրջանակներում ներկայացված տնտեսական հեղափոխության հայեցակարգին։
«Կառավարությունը դեռ պետք է հստակեցնի տնտեսական հեղափոխությունը խթանող միջոցառումների ցանկը»,– հայտարարեց վարչապետն ու կառավարության անդամներին տվեց այդ ուղղությամբ կոնկրետ հանձնարարականներ։
«Մեր ձեռքի տակ կան բազմաթիվ ներդրումային ծրագրեր, դրանց մի մասն իրականանալի է, մի մասն անլուրջ է։ Այդ ներդրումային ծրագրերի վրա դեռ պետք է աշխատել»,– ասաց Փաշինյանը։ Նրա խոսքով` ներդրողներից յուրաքանչյուրն իր նախասիրություններն ունի` մեկը նախընտրում է աշխատել փոխվարչապետների հետ, մեկը` նախարարների։ Նիկոլ Փաշինյանը դրանում բացասական բան չի տեսնում, բայց հրահանգում է, որպեսզի բանակցությունների վերջնական արդյունքները ներկայացվեն Տնտեսական զարգացման ու ներդրումների նախարարությունում։
Տնտեսական հեղափոխության հաջորդ քայլերը ներկայացնելով` վարչապետը, մասնավորապես, կարևորեց գազի ջրի, լույսի հասանելիության ապահովումը ՀՀ տարածքում, բանկային տոկոսադրույքների նվազեցումը, բիզնես հմտություններ սովորեցնող ընկերությունների հետ համագործակցությունն ու ծրագրերին աջակցելը։
Վարչապետը կարևորեց նաև Ներդրումների հայկական հիմնադրամի ստեղծումը` փոխվարչապետ Ավինյանին հրահանգելով հնարավորինս արագացնել այդ աշխատանքները։
Նիկոլ Փաշինյանը կարևորեց նաև ջրամբարաշինության ու ճանապարհաշինության ծրագրերի իրականացումը։
Անդրադառնալով ծրագրի սոցիալ–տնտեսական ոլորտին` Փաշինյանը պատվիրեց բացահայտել այն մարդկանց, ովքեր ամսական 100 000 դրամի և ավելի վարկ են վճարում ու օգտվում են նպաստի համակարգից։
Միաժամանակ, վարչապետը կարևորեց, որ իրականում սոցիալապես ծանր պայմաններում գտնվող քաղաքացիները սեզոնային ժամանակավոր աշխատանքի պատճառով չզրկվեն նպաստից։
«Ընտանեկան և սոցիալական նպաստ ստացող մարդը պետք է չզրկվի այդ համակարգից»,– ասաց Փաշինյանը` Աշխատանքի և սոցիալական հարցերի նախարար Զարուհի Բաթոյանին հանձնարարելով լուծումներ գտնել նպաստների հասցեականությունն ապահովելու համար։
Վարչապետը նշեց նաև մսի և կենդանի գլխաքանակի արտահանումն ավելացնելուն ուղղված ծրագրերի մշակումը և հանձնարարեց պատրաստվել պտուղ–բանջարեղենի արտահանման սեզոնին։
Փաշինյանը կարևորեց նաև կաթիլային ոռոգման համակարգերի, հակակարկտային ցանցերի ու այլ ժամանակակից տեխնոլոգիաների կիրառումը գյուղատնտեսության մեջ։
Տեղեկատվական տեխնոլոգիաների ոլորտում վարչապետը կարևորեց կրթական ու ուսումնական ծրագրերի վերանայումը ուսումնական հաստատություններում` նշելով` ինքնանպատակ դասընթացներ մեզ պետք չեն։
Փոխվարչապետ Տիգրան Ավինյանն անդրադարձավ թափուր աշխատատեղերի խնդրին` նշելով, որ գործազրկության բարձր քանակի հետ մեկտեղ Հայաստանում կան մեծ քանակով թափուր աշխատատեղեր։ Կառավարության գործառույթը, նրա խոսքով, այս տեղեկատվության համադրում է, որպեսզի թափուր աշխատատեղերն արագ համալրվեն, գործազրկությունն էլ կրճատվի։
