ԵՐԵՎԱՆ, 15 փետրվարի — Sputnik. Երևանի ընդհանուր իրավասության դատարանն այսօր` փետրվարի 15-ին, հետաձգեց Մանվել Գրիգորյանին գրավով ազատելու միջնորդության քննությունը։ Հետաձգման պատճառն այն էր, որ քննիչը չէր ներկայացել դատարան։ Այս մասին լրագրողներին հայտնեց Մանվել Գրիգորյանի պաշտպան Լևոն Բաղդասարյանը։
Փաստաբանը հայտնեց նաև, որ պաշտպանական կողմը միջնորդել էր Մանվել Գրիգորյանի նկատմամբ կիրառված խափանման միջոց կալանքը փոխարինել 20 մլն դրամ գրավով։
Նշենք, որ Գրիգորյանն այս պահին բուժում է ստանում քաղաքացիական հիվանդանոցում, որտեղ նրան առողջության վատացման հետևանքով տեղափոխել էին «Երևան-Կենտրոն» քրեակատարողական հիմնարկից։
Հիշեցնենք, որ 2018թ–ի հունիսի 17-ին ԱԱԾ–ն տեսանյութ էր հրապարակել` ներկայացնելով ԵԿՄ նախագահ Մանվել Գրիգորյանին պատկանող, ՀՀ Արմավիրի մարզի Արշալույս գյուղի Լճափնյա փողոցում գտնվող հանգստյան գոտում, ինչպես նաև Էջմիածին քաղաքի Ալավերդյան փողոցի տուն 46 հասցեում տեղակայված և Գրիգորյանին պատկանող առանձնատան կատարված խուզարկության արդյունքները:
Դատարանը նախաքննական մարմնի միջնորդությամբ նրա նկատմամբ խափանման միջոց էր ընտրել կալանքը։ Ավելի ուշ այն փոխարինվել էր 25 մլն դրամ գրավով։ Դատախազությունը բողոքարկել էր այս որոշումը Վերաքննիչ դատարանում` պահանջելով նրա նկատմամբ ուժի մեջ թողնել կալանավորման մասին որոշումը։ Դատարանը բավարարել էր բողոքը։ Դատական նիստից հետո Գրիգորյանին կրկին տեղափոխել էին կալանավայր։
