ԵՐԵՎԱՆ, 15 փետրվարի — Sputnik. Պետական համակարգի պարգևավճարների ուսումնասիրությունը որոշակի խնդիրներ է բացահայտել։ Այսօր` փետրվարի 15-ին, կառավարության նիստից հետո լրագրողների հետ ճեպազրույցում այս մասին ասաց Պետական վերահսկողական ծառայության պետ Դավիթ Սանասարյանը։
«ՊԵԿ–ում, ֆինանսների նախարարությունում, տնտեսական զարգացման նախարարությունում իրականացված ուսումնասիրությունների արդյունքում մենք ռիսկեր ենք նկատել, խնդիրները տեսել ենք։ Դրանց վերաբերյալ ուսումնասիրություններ ենք կատարել և տվել ենք իրենց`կարծիք ներկայացնելու։ Կարծիքներից հետո նաև կներկայացնենք վարչապետին»,– ասաց Սանասարյանը` մինչ այդ հրաժարվելով կոնկրետ տվյալներ հրապարակելուց։
Սանասարյանը խոստացավ վարչապետի հետ համաձայնեցնելուց հետո հրապարակային հայտարարությամբ հանդես գալ։
Նա նաև հայտնեց, որ ծառայությունն ավարտել է ուսումնասիրությունը նաև ՔԿՀ–ներում ու «Աջակցություն դատապարտյալներին» հիմնադրամում։ Այս ուսումնասիրության արդյունքը ևս արդեն ներկայացվել է վարչապետին։
Ջրօգտագործողների ընկերություններում, ոռոգման ջրի դիմաց կուտակված պարտքերի մասով ուսումնասիրությունները կավարտվեն մարտի 15-ին։ ՋՕԸ–ների տնօրեններից ոմանք, նրա խոսքով, խոստովանականներ են գրել, որ գյուղացիների վճարած գումարները թաքցրել են։ Աշխատանքներ են տարվել նաև գյուղացիների հետ`ջրի պարտքի իրական պատկերը ստանալու համար։
«Տուն առ տուն գյուղացիների հետ հանդիպում են մեր աշխատակիցները, բացատրություններ են վերցնում»,– հայտնեց Սանասարյանը։
Վերահսկողական ծառայության պետը հայտնեց նաև , որ ուսումնասիրությունները շարունակվում են ԵՊՀ–ում ու Բժշկական համալսարանում։
Վերջինի պարագայում ուսումնասիրությունը երկարում է ծավալների պատճառով։ «Ծավալները բավականին մեծ են` և՛ ֆինանսների, և՛ ծախսերի։ Գիտեք նաև, որ համալսարանն ունի կլինիկա»,– ասաց Սանասարյանը` նշելով, որ այս բուհում ուսումնասիրությունները կավարտվեն մարտի վերջին։
Երիտասարդական հիմնադրամում դրանք ևս դեռ շարունակվում են։ Տնօրենի դեմ հարուցված քրեական գործի շրջանակներից բացի, ծառայության աշխատակիցներն այժմ ուսումնասիրում են, թե ինչպես ու ինչ ծրագրերի վրա են ծախսվել հիմնադրամի գումարները։
Ուսումնասիրություններ են սկսել նաև Գյուղատնտեսության նախարարության «Սերմերի գործակալությունում»։
Իսկ համայնքներում իրականացված ուսումնասիրություններով Նոր Գեղի, Ազատամուտ, Անի համայնքներում չարաշահումների կասկածով քրեական գործեր են հարուցվել։
