ԵՐԵՎԱՆ, 14 փետրվարի — Sputnik. ՌԴ արտգործնախարարության պաշտոնական ներկայացուցիչ Մարիա Զախարովան չի զարմացել, որ Սիրիայում «քիմհարձակման» մասին պատմող տեսանյութերը կեղծ են։ Զախարովան այս մասին ասել է ճեպազրույցի ժամանակ։
Նրա խոսքով` այսօրվա հրապարակումներն ապացուցում են, որ 2018 թվականի գարնանը Դումա քաղաքի «քիմհարձակումը» բեմադրված է եղել։
«Աբսուրդի այս թատրոնի գագաթնակետը կարելի է համարել BBC–ի բրիտանական պրոդյուսերի հայտարարությունը։ Նա հաստատել է, որ իրենց «սպիտակ սաղավարտների» մասնակցությամբ նկարահանումները բեմադրված են եղել։ Լավ կլիներ` լսեինք BBC–ի դիրքորոշումը, քանի որ նրանք ակտիվորեն լուսաբանում էին այդ իրադարձությունները», – Զախարովայի ասած փոխանցում է ՌԻԱ Նովոստին։
ԱԳՆ պաշտոնական ներկայացուցիչը հիշեցրել է, որ այդ նյութերը ներկայացնելու ռակուրսը միանշանակ էր` հօգուտ այսպես կոչված կոալիցիայի գործողությունների, իսկ արտասահմանյան քաղաքական գործիչները պահանջում էին պատժել Սիրիայի նախագահ Բաշար ալ-Ասադին ու նրան աջակցող Ռուսաստանին։
Երեկ BBC հեռուստաընկերության պրոդյուսերը պարզել է, որ «Սպիտակ սաղավարտների» տեսանյութերը բեմադրված են եղել։ Դա խոստովանելու համար վեց ամիս է հարկավոր եղել։ Դրա հետ կապված Զախարովան նշել է, որ Ռուսաստանի ԱԳՆ–ն կեղծիքը բացահայտելու համար հենց այդ ժամկետն էր նշել։
«Արևմուտքը քողարկվում էր ականատեսների վկայություններով, «հումանիտար օգնություն» ցուցաբերողները («սպիտակ սաղավարտները. խմբ.) ոչ ոքի չէին զարմացրել։ Իրադարձությունների զարգացման հետ կապված մեր կանխատեսումներն արդարացան։ Մենք նույնիսկ ասում էինք, որ դա կես տարվա մեջ կլինի։ Ահա այսօրվա հրապարակումը հենց այն է, ինչի մասին խոսում էինք անցած տարի։ Նշանակում է, որ տարիներ շարունակ Սիրիայի հարցում տրագիֆարս ենք տեսնում», – ասել է Զախարովան։
Նա ավելացրել է, որ կարելի է միայն զարմանալ` որքան են ցածրացել քաղաքական գործիչները, որ կեղծ տեսանյութեր են պատրաստում։
Ավելի վաղ Արևմուտքը Դամասկոսին մեղադրել էր սիրիական Դումա քաղաքում քիմիական հարձակում իրականացնելու համար։ Մոսկվան հերքել էր սիրիական զինվորականներին վերագրված մեղադրանքը։ ԱՄՆ-ն խոստացել էր մտածել սիրիական Դումայում իրականացված քիմիական հարձակմանը պատասխան հարված հասցնելու մասին։
Դումայում քիմիական հարձակման մասին քարոզչական հոլովակն առիթ էր դարձել Սիրիայի վրա հրթիռային հարվածներ հասցնելու համար։ Արևմտյան կոալիցիայի անդամները` ԱՄՆ–ի գլխավորությամբ, տեսահոլովակում ցուցադրվող կադրերն ընդունել էին հալած յուղի տեղ` չստուգելով փաստերը։ Ռուսական Russia Today լրատվական գործակալությանը հաջողվել էր գտնել Դումա քաղաքում քիմիական հարձակման տեսահոլովակի տղային, որը պատմել էր, թե ինչպես են իրեն նկարել «Սպիտակ սաղավարտները»` ներկայացնելով որպես Դումայում «քիմիական հարձակումից» տուժած։
ՄԱԿ-ում Ռուսաստանի մշտական ներկայացուցիչ Վասիլի Նեբենզյան իր հերթին կոչ էր արել ԱՄՆ-ին ռազմական արկածախնդրության չգնալ Սիրիայում։
