ԵՐԵՎԱՆ, 14 փետրվարի — Sputnik. ՀՀԿ փոխնախագահ Արմեն Աշոտյանը ֆեյսբուքում պատասխանել է Նիկոլ Փաշինյանի` Ազգային ժողովում արված արտահայտությանը։
«Դուք Աշոտյանից չեք պրծել և չեք պրծնելու: Հանգիստ նստեք տեղներդ»,– գրել է Աշոտյանը։
ՀՀԿ փոխնախագահը, հետևելով ԱԺ–ում կառավարության ծրագրի եռօրյա քննարկումներին, նշում է. «Ցավալի է, որ Նիկոլ Փաշինյանն իր քաղաքական ինքնությունը շարունակում է կառուցել՝ կախվելով Սերժ Սարգսյանի քաղաքական կապիտալից: Այո, երբեք չփորձեք մեզ համեմատել Նիկոլ Փաշինյանի և իր թիմի հետ: Դա վիրավորանք է մեզ համար:
Էլի դատարկ մեղադրանքներ, որոնց մասին այս 10 ամսվա ընթացքում, գործի դնելով ողջ ռեպրեսիվ պետական ապարատը, այդպես էլ որևէ փաստական ապացույց չկա»:
Աշոտյանը հիշեցնում է Եվրոպական Միության հետ համաձայնագրի իրականացման լճացած վիճակը` հավելելով, որ առ այսօր ոչ միայն կոնկրետ գործողություններ, այլ անգամ ճանապարհային քարտեզ չկա։ Իսկ Փաշինյանի խոսքերի և գործերի միջև առկա է Մեծ Կանյոնի չափ խորը անդունդ։
«Ցավում եմ իմ երկրի Ազգային Ժողովի հեղինակության համար, որտեղ կառավարության ղեկավարը թույլ է տալիս իրեն նման տոնով և ոճով խոսել պատգամավորների հետ և ընդդիմախոսների մասին: Այս իշխանությունները ունակ չեն հանդուրժել անգամ այն մեղմ քննադատությունը, որ հնչեց իրենց հասցեին Ազգային Ժողովի դահլիճում»,– գրում է Աշոտյանը:
Ի մի բերելով ԱԺ–ի քննարկումներն ու կառավարության ծրագիրը` Արմեն Աշոտյանը կանխատեսում է, որ մոտակա տարիներին Հայաստանում շարունակելու է լավանալ միայն Նիկոլ Փաշինյանի շրջապատի կյանքը, իսկ ժողովրդին մնում է ապավինել «եղունգ ունես՝ գլուխդ քորիր» սկզբունքին:
ՀՀ վարչապետ Նիկոլ Փաշինյանն այսօր ԱԺ–ի ամբիոնից իր ելույթում հիշատակել էր Արմեն Աշոտյանի մասին։
«Աշոտյանից պրծանք, հիմա էլ ասում են՝ ԵՄ հետ պայմանագիրը չի իրականացվում»,– ԱԺ ամբիոնից` անդրադառնալով իշխանությունների հասցեին հնչող քննադատություններին, ասել էր Փաշինյանը։
