ԵՐԵՎԱՆ, 12 փետրվարի — Sputnik. Հայաստանում կստեղծվի նոր հակակոռուպցիոն մարմին: Այս մասին այսօր խորհրդարանում հայտարարեց ՀՀ վարչապետ Նիկոլ Փաշինյանը` ներկայացնելով ՀՀ կառավարության գործունեության 5-ամյա ծրագրում կոռուպցիայի դեմ պայքարի հիմնական դրույթները:
«ՀՀ ցանկացած պետական պաշտոնյա և պետական պաշտոնի հավակնող ցանկացած մարդ ՀՀ լիազոր մարմնին պետք է տա նոտարական կարգով հաստատված լիազորագիր, որ այդ մարմինը աշխարհի ցանկացած տեղում իր անունից կարող է փնտրել, գտնել, արձանագրել իր ունեցած գույքի ծավալը, տեղաբաշխումը և այն ներկայացնել ՀՀ հանրությանը»,- ասաց Փաշինյանը:
Վարչապետի խոսքով` նորաստեղծ մարմինը գործելու է ոչ թե որպես հետաքննական մարմին, այլ որպես պաշտոնյայի լիազոր ներկայացուցիչ:
«Եվ այն պաշտոնյան կամ պաշտոնի հավակնող մարդը, որը կհրաժարվի նման լիազորագիր տրամադրել, կզրկվի պաշտոն զբաղեցնելու իրավունքից»,- ասաց Փաշինյանը:
Վարչապետը նշեց, որ արդեն մի քանի ամիս է, ինչ իրավաբանների հետ քննարկվում է այն հարցը, թե արդյոք դրանով չի ոտնահարվում մարդկանց իրավունքները: «Ես կարծում եմ, որ` ոչ, չենք ոտնահարում մարդկանց իրավունքները, որովհետև մենք բոլոր մարդկանց չենք պարտադրում այդպես վարվել, մենք պարտադրում ենք այն մարդկանց, ովքեր հավակնում են ծառայություններ մատուցել ՀՀ ժողովրդին։ Եվ ժողովրդի համար պետք է թափանցիկ լինի, թե այդ մարդը մինչ պաշտոնը ստանձնելը ինչ ուներ, ընթացքում ինչ ունի»,- ասաց Փաշինյանը:
Թե նորաստեղծ մարմինն ինչ լիազորություններ ու առաքելություններ է ունենալու, վարչապետի խոսքով, դեռ քննարկման փուլում է:
Ինչ վերաբերում է հետհեղափոխական հակակոռուպցիոն պայքարին, այն Փաշինյանի դիտարկմամբ, որոշակի տեղապտույտում է գտնվում: ՀՀ վարչապետը քննչական մարմիններին կոչ արեց ակտիվացնել պայքարն այս ուղղությամբ:
Հիշեցնենք` վարչապետ Փաշինյանն այսօր ԱԺ-ում է` ներկայացնելու ՀՀ կառավարության առաջիկա 5 տարվա գործունեության ծրագիրը:
Ծրագիրը կառավարությունը հաստատել էր փետրվարի 8-ի նիստում ու այն ուղարկել խորհրդարանի հաստատմանը:
