ԵՐԵՎԱՆ, 10 փետրվարի — Sputnik, Արմենուհի Մխոյան. Ընտանիքների մի մասն արդեն տեղափոխվել է նոր բնակարան, բայց պաշտոնապես նրանց բնակարանների վկայականները կհանձնվեն ավելի ուշ:
Ինչպես Sputnik Արմենիային տեղեկացրեց Մայր Աթոռի Սոցիալական ծառայության գրասենյակի ղեկավար Տեր Մարկոս քահանա Մանգասարյանը՝ ընտանիքների ընտրությունը կատարվել է ըստ առաջնահերթության.
«Հաշվի է առնվել այն հանգամանքը, որ այս ընտանիքները մինչ այս երբևէ, որևէ կազմակերպության կողմից բնակարանի փոխհատուցում կամ բնակարան չի ստացել և ունեն անօթևանի կարգավիճակ»,- պարզաբանեց նա:
Մինչ ընտանիքների ընտրությունը, այցելություն է եղել շահառուներին:
«Գյումրիում մինչ ընտանիքների ընտրությունը 50 ընտանիք ենք այցելել: Այս պահին արդեն ծրագիրը ավարտական փուլում է՝ ընտրվել են ընտանիքները, գնված են տները: Վեհափառի Հայաստան վերադառնալուն պես կկազմակերպենք այդ ընտանիքներին վկայագրերի հանձնման արարողությունը»,-նշեց Տեր Մարկոսը հավելելով, որ ընտանիքներից ոմանք արդեն բնակվում են այդ տներում:
«Բնակարանները գնելուց հաշվի ենք առել նաև ընտանիքիների կարծիքները: Ի դեպ, եղավ դեպք, երբ 1 ընտանիք հրաժարվեց մեր առաջարկած բնակարանից , այն դեպքում, որ ինքը բնակվում էր 20 քառակուսի մետրանոց տնակի մեջ, իսկ մենք առաջարկում էինք 62 քառակուսի մետր մակերես ունեցող բնակարան: Չուզեցին, քանի որ չհամաձայնեցին հրաժարվել տնակից և տնակ քանդելու պայմանից»,- մանրամասնեց Տեր Մարկոսը:
Նշենք, որ գնվածները բնակարաններ են: Որպես պարտադիր պայման՝ շահառուները հրաժարվում են տնակից և այդ տնակը քանդվում է: Բնակարանները նվերը է՝ սեփականության իրավունքով:
Հավելենք, որ Տեր Մարկոսի տեղեկացմամբ իրենց շատ է օգնել «Գյումրին առանց տնակների» հիմնադրամը՝ բոլոր բազաները ճշտվել է իրենց բազայի համաձայն:
