ԵՐԵՎԱՆ, 10 փետրվարի — Sputnik. Այսօր՝ փետրվարի 10-ին, Լոս Անջելեսում կկայանա «Գրեմմի» 61-րդ երաժշտական մրցանակաբաշխությունը:
«Գրեմմի» երաժշտական մրցանակաբաշխության «Լավագույն օպերային ձայնագրություն» անվանակարգում առաջադրվել է Վերդիի «Ռիգոլետտո» օպերայի ձայնագրությունը, որն իրականացրել է հայտնի «Դելոս» ընկերությունը։
«Այսօրինակ հեղինակավոր համաշխարհային մրցանակաբաշխությանը հայազգի արտիստի, առավել ևս՝ Հայաստանի օպերային թատրոնի տնօրենի և գեղարվեստական ղեկավարի՝ մաեստրո Կ․ Օրբելյանի մասնակցությունն արդեն իսկ մեծագույն հպարտություն է յուրաքանչյուր հայի համար», - գրված է Օպերայի և բալետի ակադեմիական թատրոնի Facebook-ի էջում։
Օպերայի անձնակազմը գրառման մեջ շնորհավորել է Օրբելյանին այս կարևոր մրցանակաբաշխությանն առաջադրված լինելու և մասնակցելու կապակցությամբ և մաղթել, որ նորանոր ձեռքբերումներն ու ստեղծագործական նվաճումները մշտապես ուղեկցեն նրան։
