ԵՐԵՎԱՆ, 9 փետրվարի – Sputnik, Արմենուհի Մխոյան. Եվրամիությունը կշարունակի աջակցել Հայաստանին հակակոռուպցիոն ծրագրեր իրականացնելու գործում: Այսօր Գյումրիում լրագրողների հետ ունեցած ճեպազրույցի ժամանակ այս մասին ասաց Հայաստանում Եվրոպական միության դեսպան Պյոտր Սվիտալսկին:
«Այդ ուղղությամբ աջակցություն ենք տրամադրելու՝ հաշվի առնելով, որ ՀՀ կառավարությունն արդեն հաստատել է իր գործողությունների ծրագիրը, և այնտեղ կան համատեղ քայլեր, որոնցից մեկը վերաբերում է Հայաստանում հակակոռուպցիոն մարմնի ստեղծմանը: Մենք հավատացած ենք, որ նոր Հայաստանում կոռուպցիայի դեմ պայքարելու քաղաքական ամուր կամք կա: Բայց այդ նախաձեռնությունը, անշուշտ, հանրության աջակցություն և ինստիտուցիոնալ ու օրենսդրական կառույցների առկայություն է պահանջում»,– ասաց նա:
Եվրամիությունը հիմնականում ծրագրերի է իրականացնում Հայաստանի 3 մարզերում՝ Շիրակ, Լոռի և Տավուշ: Ծրագրերը բազմաբնույթ են և ներառում են զբոսաշրջության, տեղեկատվության, գյուղատնտեսության և մի շարք այլ ոլորտներ: Սվիտալսկու խոսքով` ԵՄ–ն նաև նոր ծրագրեր է իրականացնելու։
«Եվրամիության տրամադրած գումարի մեծ մասն ուղղվելու է բիզնես գաղափարների ֆինանսավորմանը, մասնավորապես` փոքր բիզնես ձեռնարկություններին: Հետևաբար, ակնկալում ենք բոլոր ներգրավված կողմերին ներկայացնել լավ գաղափարներ, և խոսքը միայն զբոսաշրջությանն ու գյուղատնտեսության ոլորտների մասին չէ։ Մենք ֆինանսավորում ենք նախաձեռնել նաև ստեղծարար արդյունաբերության, մշակույթի համար: Միաժամանակ կշարունակենք իրականացնել նաև այն ծրագրերը, որոնք սկսել ենք»:
Դեսպանը փետրվարի 9-ին Գյումրիում մասնակցեց «EU at LOFT in Gyumri» ծրագրի մեկնարկին: Ծրագրի շրջանակում յուրաքանչյուր երկրի համար կազմակերպվելու են տարբեր միջոցառումներ ՝ հաշվի առնելով վերջիններիս առանձնահատկությունները։ Այս միջոցառումները կներկայացնեն յուրաքանչյուր երկիր՝ ստեղծելով այդ երկրին բնորոշ միջավայր: Կներկայացվի խոհանոցը, կկազմակերպվեն ազգային խոհանոցի վարպետության դասեր, կկազմակերպվի ազգային երգ ու պարի ուսուցում և այլն:
