ԵՐԵՎԱՆ, 6 փետրվարի– Sputnik. ՀԱԿ վարչության անդամ, Հայ ազգային կոնգրեսի արտաքին հարաբերությունների հանձնաժողովի նախագահ Վլադիմիր Կարապետյանին որպես վարչապետի մամուլի խոսնակ բարեհաջող տեղավորելով նոր կառավարությունում, հիմա էլ ՀՀ առաջին նախագահ Լևոն Տեր-Պետրոսյանն ու իր թիմակիցները հաջորդ կադրին են «առաջ բրթում»: Այս մասին գրում է «Իրավունք» օրաթերթը։
«Իշխանական կուլիսներում շրջանառվող խոսակցությունների համաձայն՝ լևոնականները Նիկոլ Փաշինյանին փորձում են համոզել, որ ՀՀ ռազմական նախկին դատախազ, ԱԺ հինգերորդ գումարման ՀԱԿ խմբակցության պատգամավոր Գագիկ Ջհանգիրյանը պետք է պաշտոն ստանա, և ամենաքիչը նա կարող է լինել ՀՀ գլխավոր դատախազ»,– գրում է թերթը:
Ըստ պարբերականի` վերջիններիս կարծիքով՝ «մարտի 1»-ի գործով նա կարող է օգտակար լինել Նիկոլ Փաշինյանին, որպեսզի հանկարծ իրադարձությունների անիվը հակառակ ուղղությամբ չպտտվի և իրենց համար ոչ ցանկալի արդյունք չունենա:
«Սակայն այս գաղափարն այնքան էլ Ն. Փաշինյանի սրտով չէ, նա համոզված է, որ Ջհանգիրյանի դեպքում հանրությունը կհիշի նաև վերջինիս դատախազ աշխատած տարիների աղմկոտ գործերը»,– եզրափակում է թերթը:
![Լևոն Տեր-Պետրոսյանը հաջորդ կադրին է «առաջ բրթում» գլխավոր դատախազի պաշտոնում. «Իրավունք» Լևոն Տեր-Պետրոսյանը հաջորդ կադրին է «առաջ բրթում» գլխավոր դատախազի պաշտոնում. «Իրավունք» - Sputnik Արմենիա](https://cdn.am.sputniknews.ru/img/520/40/5204078_0:0:1600:1065_600x0_80_0_0_838f3d414ebaa9d6e8ab4a583460c892.jpg)
Գագիկ Ջհանգիրյանը իրավաբանական գիտությունների թեկնածու է։ 1991–1997թթ. նա աշխատել է արդարադատության նախարարությունում։ 1997–2006թթ եղել է Հայաստանի զինդատախազը։ 5–րդ գումարման ԱԺ պատգամավոր է եղել։