ԵՐԵՎԱՆ, 4 փետրվարի — Sputnik. Հունահռոմեական ոճի Հայաստանի հավաքականը հիանալի ելույթներ ունեցավ Ֆրանսիայում։
Ֆրանսիայի Նիս քաղաքում փետրվարի 1-4-ն անցկացվեց օլիմպիական չեմպիոն Ժան Անրի Դեգլանի անունը կրող հունահռոմեական ոճի ըմբշամարտի միջազգային մրցաշարը: Չի կարելի ասել, որ մրցաշարին մասնակցում էին աշխարհի ուժեղագույն ըմբիշները, բայց այն որ, մրցումները ներկայացուցչական էին, անառարկելի է:
2019 թվականի առաջին մրցումներում հունահռոմեական ոճի հայ ըմբիշները շատ լավ ելույթներ ունեցան: Հայաստանը ներկայացնող յոթ ըմբիշներից վեցը կանգնեցին պատվո պատվանդանին:
Չեմպիոնի կոչումը նվաճեցին Արսեն Ջուլֆալակյանը, Ռուդիկ Մկրտչյանը, Կարեն Ասլանյանը և Հրանտ Կալաչյանը: Բրոնզե մեդալ նվաճեցին Գևորգ Ղարիբյանն ու Արթուր Շահինյանը:
Ընդհանուր առմամբ, հայ մարզիկները Հայաստան կբերեն 6 մեդալ, որոնցից 4 ոսկե։
