ԵՐԵՎԱՆ, 1 փետրվարի — Sputnik. Մենք չենք ցանկանում ԱԳՆ–ի գործերին միջամտել, իրենք են որոշում` որ երկրների հետ ինչպես աշխատել։ Այս մասին այսօր Գերմանիայում Փաշինյան–Մերկել համատեղ ասուլիսի ընթացքում ասաց Գերմանիայի կանցլեր Անգելա Մերկելը`պատասխանելով այն հարցին, թե թավշյա հեղափոխությունից հետո արդյո՞ք ԵՄ–ն չի մեծացնում օժանդակությունը Հայաստանի հանդեպ և ինչ քայլեր են արվում վիզաների ազատականացման համար։
«Մենք ունենք պայմանագիր, որով զարգացնում ենք մեր հարաբերությունները տարբեր երկրների հետ»,–ասաց Մերկելը։
Իսկ ՀՀ վարչապետ Նիկոլ Փաշինյանը կարծում է, որ Եվրոպական հանձնաժողովի հարևանության և ընդլայնման հարցերով հանձնակատար Յոհաննես Հաանի վերջին այցը Հայաստան հստակ պատասխան տվեց այդ հարցին` կընդլայնվեն Հայաստանին տրվող օժանդակության ծավալները։
«Հայաստանում ժողովրդավարական զարգացումներ են տեղի ունենում, և անկախ արտաքին աջակցությունից, ժողովրդավարական գործընթացները շարունակվելու են։ Եվ կարևոր է, որ այս տեսակետից մեր առաջ չի դրվում աշխարհաքաղաքական առումով ընտրություն կատարելու խնդիր։ Մենք լավ հարաբերություններ ենք պահպանում և՛ ԵԱՏՄ–ի, և՛ ԵՄ–ի երկրների հետ։ Գնդակը ՀՀ կառավարության դաշտում է»,–ասաց ՀՀ վարչապետը։
Խոսելով վիզաների ազատականացման մասին Փաշինյանի ընդգծեց, որ պետք է ինստիտուցիոնալ այնպիսի փոփոխություններ իրականացնենք, որ Հայաստանը չդիտարկվի որպես փախստականներ ներմուծող երկիր։ «Կարծում եմ` արդեն ժամանակն է` Եվրամիության երկրների հետ վիզաների ազատականացման բանակցությունները սկսելու»,–ասաց ՀՀ վարչապետը։
Նշենք, որ մինչ ասուլիսը Բեռլինում այսօր` փետրվարի 1-ին, կայացել էր Գերմանիայի կանցլեր Անգելա Մերկելի և ՀՀ վարչապետ Նիկոլ Փաշինյանի հանդիպումը:
Երկու երկրների ղեկավարների բանակցություններն ընթացել են ճաշի սեղանի շուրջ, որի ավարտին երկու երկրների ղեկավարները հանդես են եկել մամուլի ասուլիսով։
Ավելի վաղ Փաշինյանը հանդիպել էր Բունդեսթագի նախագահ Վոլֆգանգ Շոյբլեի հետ, այցելել Կոնրադ Ադենաուեր հիմնադրամի գրասենյակ։
