ԵՐԵՎԱՆ, 1 փետրվարի – Sputnik. ՀՀ երկրորդ նախագահ Ռոբերտ Քոչարյանի ընտանիքին պատկանող բիզնեսների մասով Ազգային անվտանգության ծառայությունը համապատասխան հայտարարություն կանի: Այս մասին այսօր լրագրողների հետ ճեպազրույցի ժամանակ ասաց Ազգային անվտանգության ծառայության տնօրեն Արթուր Վանեցյանը՝ անդրադառնալով Քոչարյանի ընտանիքին պատկանող բիզնեսների մասին իր` նախկինում արված հայտարարությանը:
«Ինչ վերաբերվում է Քոչարյանի ընտանիքին պատկանող բիզնեսների մասին իմ հայտարարությանը, ապա քրեական գործ կա հարուցված, իրականացվում է քննություն, և արդյունքների մասին կլինի համապատասխան հայտարարություն ԱԱԾ քննչական դեպարտամենտի կողմից»,- ասաց Վանեցյանը:
Հիշեցնենք` Վանեցյանը դեռ հոկտեմբերի 16-ին, ի պատասխան լրագրողների դիտարկմանը, թե որոշ ժամանակ առաջ նա հայտարարել էր այդ հյուրանոցի հետ ՀՀ երկրորդ նախագահ Ռոբերտ Քոչարյանի կապի մասին, հայտնել էր, որ ԱԱԾ–ն տեսանյութ կտարածի Երևանի «Կոնգրես» հյուրանոցի իրական սեփականատերի մասին։
