ԵՐԵՎԱՆ, 1 փետրվարի – Sputnik. Բագրատաշենի անցակետի հարևանությամբ կա ազատ տարածք, որտեղ, հնարավոր է, տեղափոխվեն այնտեղ կայանված աջ ղեկով մեքենաները։ Այսօր՝ փետրվարի 1-ին, լրագրողների հետ զրույցում այս մասին ասաց Ազգային անվտանգության ծառայության տնօրեն Արթուր Վանեցյանը։
«Այսօր ինձ զեկուցեցին, որ հենց սահմանակետի կողքին կա ազատ տարածք։ ՊԵԿ-ի հետ քննարկումներից հետո կփորձենք քաղաքացիներին հորդորել, որ իրենց մեքենաները տեղափոխեն այդ տարածք, մինչև աջ ղեկով մեքենաների ճակատագրի վերաբերյալ համապատասխան որոշում ընդունվի», - ասաց Վանեցյանը։
Նա անդրադարձավ նաև այն քննադատություններին, թե «ԱԱԾ–ն խառնվում է ոչ իր իրավասության տակ եղած գործերին»` նշելով, որ ԱԱԾ-ն իրականացնում է սահմանային հսկողություն, իսկ մեքենաների կուտակումը խանգարում է սահմանի լիարժեք հսկողության իրականացմանը:
«Բագրատաշենի անցակետի համար մեր տարածած հայտարարությունը վերաբերում էր կոնկրետ մեր գործառույթներին։ Այդ մեքենաների կուտակումը խանգարում է իրականացնել սահմանի լիարժեք վերահսկողություն, խոչընդոտներ է ստեղծում քաղաքացիների համար։ Մոտ 700-800 մեքենա կա այնտեղ, ու դրանք անընդհատ ավելանում են», - ասաց ԱԱԾ տնօրենը։
Վանեցյանը նշեց, որ ԱԱԾ–ն ավտոմեքենաները դուրս բերելու կոչով դիմել է քաղաքացիներին, որպեսզի իրենք կարողանան կատարել իրենց լիազորությունները։
«Հավաստիացնում եմ, որ սահմանի վերահսկողական միջոցառումներն իրականացնելու համար անհրաժեշտ է, որ այնտեղ լինի ազատ տարածք։ Օրինակ` գալիս են բեռնատար ավտոմեքենաները և շրջադարձ կատարելու տեղ չունեն։ Աջ ղեկով ավտոմեքենաներն էլ վնասվում են, գողություններ են կատարվում, այդ պատճառով էլ կոչ արեցինք, որ ավտոմեքենաներն այդտեղից հանեն»,– ասաց ԱԱԾ տնօրենը։
Հիշեցնենք` հունվարի 23–ին ԱԱԾ–ն հաղորդագրություն և լուսանկարներ էր տարածել` նշելով, որ ՀՀ պետական սահմանի «Բագրատաշեն» անցակետում կայանված տրանսպորտային միջոցները (հիմնականում` աջ ղեկով) խոչընդոտում են մաքսակետի բնականոն գործունեությունը, ստեղծում ավելորդ դժվարություններ:ԱԱԾ–ն կոչ էր արել տրանսպորտային միջոցների սեփականատերերին 7-օրյա ժամկետում անցման կետի տարածքից դուրս բերել ավտոմեքենաները։
